Սահմանադրական փոփոխությունների ընդունումից հետո հայ ժողովուրդը զրկվելու է իշխանություն ձեւավորելու իրավունքից: Այսօր՝ նոյեմբերի 26-ին, «Այո»-ի եւ «Ոչ»-ի ռեալիթի շոուի շրջանակում Արմավիրի մարզի Մերձավան գյուղի բնակիչների հետ հանդիպմանը նման կարծիք է հայտնել Գերագույն խորհրդի նախկին պատգամավոր Ազատ Արշակյանը:
«Իշխանություններն ասում են՝ «այո» ասեք եւ մենք ձեզ կզրկենք իշխանություն ձեւավորելու իրավունքից: Առաջարկվող Սահմանադրությամբ ժողովուրդն իշխանություն ձեւավորելու իրավունքից է զրկվում: Դուք նույնիսկ գյուղապետ ընտրելու իրավունքից եք զրկվելու, ոչ մեկ ձեր առջեւ պատասխանատու չի լինելու»,- ասել է Ազատ Արշակյանը:
Արշակյանի այս պնդումը բարկացրել է ԱԺ ՀՀԿ խմբակցության պատգամավոր Վարդան Այվազյանին:
«Եթե ցույց կտաք, թե որտեղ է գրված, որ գյուղապետ չեք կարող ընտրել, ես պատրաստ եմ ուտել այս փաստաթուղթը: Որ խոսում եք մի փաստաթղթի մասին, գոնե կարդացեք այն: Չի կարելի չէ՞, բարի եղեք, Սահմանադրությունը մինչեւ վերջ կարդացեք, հետո կարծիք ասեք»,- նշել է Վարդան Այվազյանը:
Ազատ Արշակյանը պնդել է, որ սահմանադրական փոփոխություններում կա նման դրույթ:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին: