Հայաստանը միշտ էլ կողմ է եղել Ցեղասպանության ժխտման համար պատժին: Այս մասին նոյեմբերի 26-ին Կառավարության նիստից հետո լրագրողներին հայտնել է ՀՀ ԱԳ փոխնախարար Շավարշ Քոչարյանը՝ մեկնաբանելով նախօրեին Ռուսաստանի Պետդումա մտած համապատասխան օրինագիծը:
Ռուսաստանի խորհրդարանականները կընդունեն այն թե ոչ՝ իրենց գործն է, հավելել է Քոչարյանը: Այսպես թե այնպես, նրա խոսքով, Հայաստանը ողջունում է այն փաստը, որ Ռուսաստանը 1995 թ. ճանաչել է Հայոց Ցեղասպանությունը: «Հայաստանը միշտ էլ կողմ է եղել, որ այս հանցագործության ժխտման համար քրեական պատիժ սահմանվի: Դրա համար էլ սպասենք, տեսնենք թե ինչ գործըթնացներ կլինեն»,- նշել է փոխնախարարը: Պատասխանելով այն հարցին, թե Հայաստանի վրա ինչպես կարող է անդրադառնալ Ռուսաստանի ու Թուրքիայի հարաբերությունների սրացումը՝ Շավարշ Քոչարյանը հայտարարել է «Հարցը մի կողմից մեր դաշնակցին է վերաբերում, մյուս կողմից էլ՝ մեր անմիջական հարեւանին: Հետեւաբար մենք պետք է ուշադիր հետեւենք իրադարձությունների բոլոր հնարավոր զարգացումներին»: