Անխոս իմաստ չունի Թուրքիայում Ռուսաստանի հաշվին ատոմային կայան կառուցել եւ անխոս կտրականապես անիմաստ է Թուրքիայի տարածքն օգտագործել ռուսական գազը Եվրոպա արտահանելու համար: Այս մասին NEWS.am –ի թղթակցի հետ զրույցում ասել է Մերձավոր Արեւելքի ինստիտուտի նախագահ, արեւելագետ Եվգենի Սատանովսկին՝ անդրադառնալով Սիրիայում ռուսական օդանավը խոցելուց հետո Ռուսաստանի եւ Թուրքիայի միջեւ էներգետիկ նախագծերին:
Նրա խոսքով՝ Ռուսաստանի համար, ի դեմս Թուրքիայի, բարեկամական երկիր գոյություն չունի: «Մենք չունենք գործընկեր, որի վրա կարելի է հույս դնել, մենք ունենք երկիր, որը ոչ թե հակաահաբեկչական կոալիցիայի անդամ է, այլ Կատարի եւ Սաուդյան Արաբիայի հետ ահաբեկչական կոալիցիայի մաս է կազմում»,- ասել է Սատանովսկին:
Հիշեցնենք, որ նոյեմբերի 24-ին Թուրքիայի ՌՕՈւ-ն Սիրիայում խոցել էր ռուսական Սու-24 ռմբակոծիչը:
Նշենք, որ Ռուսաստանն ու Թուրքիան համաձայնության էին եկել «Թուրքական հոսք» գազամուղի իրացման հարցում: Գազատարը, որի հզորությունը պետք է կազմի տարեկան մինչեւ 32 մլն խ/մ, պլանավորվում է գցել Սեւ ծովի հատակով՝ Անապայից դեպի Թուրքիա: Թուրք-հունական սահմանին պլանավորվում է գազային հանգույց կառուցել, որով գազ կմատակարարվի Եվրոպա: