Ազգային ժողովի ՀՀԿ խմբակցության ղեկավար Վահրամ Բաղդասարյանը կարծում է, որ ՀՀ առաջին նախագահ Լեւոն Տեր-Պետրոսյանի հրապարակած հոդվածում նորություն չկա:
«Զարմանում եմ, որ նման փորձառու քաղաքական գործիչը եւ Հայաստանի Հանրապետության առաջին նախագահը Սահմանադրական փոփոխությունները կապում է աշխարհաքաղաքական զարգացումների եւ լարումների հետ: Այս լարումները կարող են տասնամյակներ ձգվել, պետք է Սահմանադրական փոփոխություններ չանե՞նք»,- NEWS.am-ի թղթակցի հետ զրույցում ասաց Վահրամ Բաղդասարյանը:
Հիշեցնենք, որ նոյեմբերի 26-ին Տեր-Պետրոսյանը հոդված է հրապարակել, որտեղ հույս է հայտնում, որ Սերժ Սարգսյանը «պետական մտածողություն դրսեւորելով, ի զորու է թեկուզ ժամանակավորապես կասեցնել նոր սահմանադրության ընդունման գործընթացը, իսկ եթե դա այլեւս անհնար է, գոնե հրաժարվել ամեն գնով հանրաքվեի արդյունքները կեղծելու մտքից»:
«Վստահ եմ, որ Հայաստանի իշխանական համակարգում Սերժ Սարգսյանը թերեւս միակ անձն է, ով հստակ գիտակցում է մեր երկրի շուրջ ստեղծված ներկայիս աշխարհաքաղաքական իրավիճակի պարունակած վտանգները»,- ասել է նա: