Երեւանի «Մոր եւ մանկան առողջության պահպանման կենտրոնում» կատարված վիրահատությունից 14 օր անց «Էրեբունի» ԲԿ-ում սեպտեմբերի 1-ին մահացած 39-ամյա Կարինե Աղաբեկյանի գործով նշանակվել է հանձնաժողովային դատաբժշկական փորձաքննություն: Այս մասին NEWS.am-ի թղթակցին ասաց տուժողի իրավահաջորդի ներկայացուցիչ, փաստաբան Արթուր Խաչիկյանը:
«Դատաբժշկական փորձաքննության պատասխանն արդեն ունենք, նախնական տվյալներով, մահը վրա է հասել բազմաօրգանային անբավարարությունից, որն էլ պայմանավորված է եղել արգանդի միոմայի հեռացումով, զարգացած թոքերի այտուցով, որովայնի հատումով եւ այլ գործոններով: Այժմ նշանակվել է հանձնաժողովային դատաբժշկական փորձաքննություն»,- ասաց Արթուր Խաչիկյանը:
Փաստաբանը հայտնեց նաեւ, որ փորձաքննության օրը դեռ չի նշանակվել, իսկ մինչ այդ իրենք պատրաստվում են միջնորդություն ներկայացնել:
Ավելի վաղ 3 երեխայի մայր Կարինե Աղաբեկյանի հարազատները NEWS.am-ի թղթակցի հետ զրույցում հայտնել էին, որ կնոջ մահվան մեջ մեղավոր են բժիշկները:
«40 րոպեանոց վիրահատությունը կատարեցին 7-8 ժամում, հետո էլ ասին, թե տեղափոխեք «Էրեբունի»: Տեսան, որ էլ չեն կարողանում պայքարել, տեղափոխեցին էնտեղ»,- ասել էին նրա հարազատները:
Դեպքի առթիվ հարուցվել է քրեական գործ Քրեական օրենսգրքի 130-րդ հոդվածի 2-րդ մասի հատկանիշներով: Նշանակվել է դատաբժշկական փորձաքննություն: