Հռոմի պապ Ֆրանցիսկոսը այցելել է Քենիայի մայրաքաղաք Նայրոբիի աղքատ ծայրամասերը ու քննադատել հարուստներին, որոնք անտարբեր են աղքատների տառապանքների նկատմամբ:
Հազարավոր մարդիկ են հավաքվել փողոցներում, որպեսզի տեսնեն Հռոմի պապին, որը ավտոմեքենայով եկել էր Նայրոբիի ամենաաղքատ թաղամասերից մեկը:
Պապի խոսքով, նրանք, ովքեր հասել են իշխանության ու հարստության, եսասիրաբար քամուն են տալիս իրենց գումարները, մինչ բնակչության մեծամասնությունը ստիպված է ապրել կեղտոտ ու լքված ծայրմասերում, հայտնում է BBC-ի Ռուսական ծառայությունը:
«Ես այստեղ եմ, որովհետեւ ուզում եմ, որ դուք իմանաք, որ ես անտարբեր չեմ ձեր ուրախությունների ու հույսերի, ձեր դժվարությունների ու վշտերի նկատմամբ»,- ասել է Պապը՝ ելույթ ունենալով տեղի կաթոլիկ տաճարի հավատացյալների առաջ:
Քանգեմի թաղամասում մոտավորապես 100 հազար մարդ է ապրում, որոնց մեծ մասը՝ կոյուղի չունեցող խրճիթներում: Նրանցից մոտավորապես 20 հազարը կաթոլիկներ են:
Նախօրեին հազարավոր քենիացիներ էին եկել Հռոմի պապի մատուցած ժամերգությանը՝ Նայրոբիի համալսարանական ճամբարում:
Քենիան Հռոմի պապի առաջին հանգրվանն էր ՝ Աֆրիկայում նրա եռօրյա ուղեւորության ընթացքում: Նա մտադիր է այցելել նաեւ Ուգանդան ու Կենտրոնական աֆրիկյան հանրապետությունը: