«Ժառանգություն» կուսակցության առաջնորդ Րաֆֆի Հովհաննիսյանը կարծում է, որ երկու օր առաջ Նորք Մարաշում ենթադրյալ զինված խմբին վնասազերծումն անլուրջ է եղել եւ նպատակաուղղված:
Այսօր` նոյեմբերի 27-ին, լրագրողների հետ հանդիպմանը «Ժառանգություն» կուսակցության նախագահը նշեց, որ դեկտեմբերի մեկին մեկնարկելիք անժամկետ նստացույցն ու հանրահավաքը պայքար է սեփական վախերի եւ ահաբեկված լինելու հետ:
«Նոր Հայաստան»-ը նաեւ հակաահաբեկչական ճակատ է: Մենք մերժում ենք բռնությունը, ահաբեկչությունը եւ պայքար ենք տալու մեր սեփական վախի եւ ահաբեկված լինելու դեմ»,- ասաց նա:
Զինված խմբի վերաբերյալ Րաֆֆի Հովհաննիսյանն այս պահին չի ցանկանում ենթադրություններ անել:
«Կսպասենք նախաքննությանը: Եթե հանցագործներ են, թող պատժվեն ամենայն խստությամբ: Կարծում եմ` փորձում են ժողովրդին վախեցնել, ահաբեկել, բայց մենք չենք ահաբեկվելու եւ մի քանի օրերի ընթացքում հակառակ արդյունքն է ունենալու»,- նշեց նա:
Ավելի վաղ հայտնել էինք, որ նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են: Կասկածյալների ընդհանուր թիվը 19–ն է, երեկվանից մայրաքաղաքում, Շիրակում եւ Կոտայքում զինված հսկողություն են իրականացնում իրավապահները` ենթադրաբար մյուս կասկածյալներին գտնելու նպատակով։
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, կատարվում է նախաքննություն:
