Նոյեմբերին Հայաստանի տարածքում անոմալ երեւույթներ չեն գրանցվել, օդի ջերմաստիճանը նորմայից մի փոքր ցածր է եղել` հատկապես Արարատյան դաշտում, տեղումների քանակը նորմայի սահմանում է եղել: Այս մասին այսօր` նոյեմբերի 26-ին, լրագրողների հետ զրույցում ասաց ՀՀ ՏԿԱԻՆ Հիդրոմետ ծառայության օդերեւութաբանության կենտրոնի պետի տեղակալ Գագիկ Սուրենյանը: Նրա խոսքով, մինչեւ նոյեմբերի 29-ի առավոտյան հանրապետությունում կգերակշռի առանց տեղումների եղանակ, իսկ նոյեմբերի 29-ի երկրորդ կեսից Հայաստանը կգտնվի ցուրտ ցիկլոնի ազդեցության գոտում եւ կսկսվեն տեղումներ: Նոյեմբերի 30-ին տեղումները կդադարեն, դեկտեմբերի մեկին առանց տեղումների եղանակ կդիտվի: Օդի ջերմային ֆոնում առաջիկա հինգ օրերին էական տատնումներ չեն սպասվում: Առաջիկա հինգ օրերի ընթացքում ձյան տեսքով տեղումներ չեն կանխատեսվում:
Գագիկ Սուրենյանը նշեց, որ վերջին երեք օրերին Լոռիում, Տավուշում եւ Սյունիքի լեռնային հովտում բարձր ջերմային ֆոն է գրանցվել: Վերջին երեք օրերին Իջեւանում, Բագրատաշենում, Դիլիջանում եւ Կապանում օդի ջերմաստիճանը ցերեկային ժամերին բարձրացել է մինչեւ +22 աստիճան, Լոռիում նոյեմբերի 12-14-ին գրանցվել է փոթորկային քամի, որը զգալի վնաս հասցրեց Հայաստանի տնտեսությանը: Նա նշեց, որ քամու առավելագույն արագությունը գրանցվեց Վանաձորում` 40 մ/վ արագություն, Երեւանում մինչեւ 28 մ/վ արագություն: