Երեւանում վնասազերծված զինված խմբի ղեկավար Արթուր Վարդանյանի նկատմամբ որպես խափանման միջոց կալանքն ընտրելու միջնորդությունը կքննարկվի նոյեմբերի 27-ին։ Այս մասին նոյեմբերի 27-ին կայացած մամուլի ասուլիսի ժամանակ ասել է փաստաբան Լեւոն Բաղդասարյանը, որը ներկայացնում է Արթուր Վարդանյանի շահերը։
Փաստաբանի խոսքով՝ նախաքննության ընթացքում տեղեկություններ տարածել այն մասին, թե Արթուր Վարդանյանը պատրաստվում էր Հայաստանում ահաբեկչություն իրականացնել, ոչ միայն անընդունելի է, այլ նաեւ հակասում է անմեղության կանխավարկածին։ «Վստահ եմ, որ նախաքննությունը կընթանա օբյեկտիվ, կտրվեն շատ հարցերի պատասխաններ։ Նախքան այդ ես խնդրում եմ զերծ մնալ անցանկալի գնահատականներից։ Արթուրը որեւէ կուսակցության անդամ չի եղել։ Նրա միակ կուսակցությունը Հայաստանն է, իսկ այդ կուսակցության անդամները՝ հայերը»,- ասել է փաստաբանը։ Նա նշել է, որ հանդիպել է Վարդանյանի հետ, վերջինս չի ընդունում իր մեղքը։ Լեւոն Բաղդասարյանը նաեւ նշեց, որ մեղադրանքը ներկայացվել է երեկ։ Նրա կարծիքով նախաքննությունը կշարունակվի մի քանի ամիս։
Հիշեցնենք, որ նոյեմբերի 25-ին Երեւանում հայտնաբերվել եւ վնասազերծվել էր զինված խումբ, որի կազմում եղել է առնվազն 20 մարդ, որոնք ծանր եւ հատկապես ծանր հանցագործություններ էին պլանավորում։ Նրանց վարձակալած տանը մի ամբողջ զինանոց էր հայտնաբերվել։