Հայաստանում մի շարք հանցագործությունների կազմակերպման մեջ մեղադրվող խմբավորման պարագլուխ Արթուր Վարդանյանը, իր բարեկեցիկ կյանքը թողնելով, իր ներդրումն է բերել հայերով բնակեցված Քեսաբ սիրիական քաղաքի ազատագրման գործին։  Այդ մասին նոյեմբերի 27–ի մամուլի ասուլիսի ընթացքում ասել է փաստաբան Լեւոն Բաղդասարյանը, որը ներկայացնում է Արթուր Վարդանյանի շահերը։  

Փաստաբանը պատմել է, որ Արթուրի հայրը՝ Վալերի Վարդանյանը որպես հետախույզ մասնակցել է Ղարաբաղյան պատերազմին եւ զոհվել է գործողություններից մեկի ընթացքում, նրա մարմինը փոխանակել են գերի ադրբեջանցու հետ։  Վալերի Վարդանյանը, նրա խոսքով, թաղված է  «Եռաբլուրի» պանթեոնում։ «Արթուրը Եվրոպայում փայլուն կրթություն է ստացել։ Նա ընտանիք ունի, երեք անչափահաս երեխա եւ բարեկեցիկ կյանքով է ապրել, լավ աշխատանք է ունեցել», - հավելել է Բաղդասարյանը։

Անդրադառնալով Ազգային անվտանգության ծառայության պետ Գորիկ Հակոբյանի հայտարարությանը այն մասին, որ խմբավորումը հրեշավոր հանցագործություններ էր նախապատրաստում, փաստաբանն ընդգծել է. «Ես խնդիր եմ տեսնում անմեղության կանխավարկածի հետ կապված։ Առայժմ նախաքննություն է կատարվում, ոչ մեկն իրավունք չունի որեւէ գնահատական տալու»։

Հիշեցնենք, որ Երեւանի Նորք–Մարաշ շրջանի տներից մեկում նոյեմբերի  25–ին ԱԱԾ–ի աշխատակիցները զինված մարդկանց մի խմբավորում են չեզոքացրել, որոնք, ԱԱԾ–ի հայտարարության համաձայն, պատրաստվում էին ծանր հանցագործություններ կատարել, այդ թվում նաեւ՝ ահաբեկչական գործողություններ։