Ֆրանսիան հասկացնել է տվել, որ մեղմել է Սիրիայի առաջնորդ Բաշար Ասադի նկատմամբ իր դիրքորոշումը` ասելով, որ նրա բանակը կարող էր ընդդիմության հետ միասին կռվել «Իսլամական պետության» դեմ, գրում է Gazeta-ն` վկայակոչելով Financial Times-ին:
Ֆրանսիայի արտգործնախարար Լորան Ֆաբիուսը հայտնել է, որ ներկայումս արեւմտյան տերությունների համար առաջնայինը իսլամիստներից Ռաքքա քաղաքն ազատելն է, ինչի համար պետք կլինի կոորդինացնել գրոհը, այդ թվում նաեւ` սիրիական բանակի:
«Երկու տեսակ միջոցներ են պահանջվում. Տեղում ռմբակոծիչներ ու բանակ, որոնք կկարողանան ներառել Սիրիական ազատ բանակը եւ պետական բանակը: Իսկ ինչու ոչ»-ասել է Ֆաբիուսը:
Հոդվածի հեղինակի կարծիքով նման կարծիքները ցույց են տալիս, որ Ֆրանսիան, որը նախկինում Ասադին ընկալում էր որպես «վտարյալի», փոխել է իր վերաբերմունքը սիրիական նախագահի հանդեպ` սկսելով համագործակցել Ռուսաստանի հետ: Ընդ որում Ֆրանսիայի արտգործնախարարը այն կարծիքին է, որ եթե Սիրիայում ազնիվ ընտրություններ տեղի ունենան, Ասադը նախագահի պաշտոնում վերընտրվելու ոչ մի շանս չի ունենա:
