Ներկայումս ԱՊՀ անդամ երկրները զբաղված են գործող խորհրդային փաստաթղթերի փոփոխությամբ եւ ներմարմնավորմամբ։ Այս մասին նոյեմբերի 27- ին՝ Երեւանում ԱՊՀ անդամ երկրների բնակչության աշխատանքի, միգրացիայի եւ սոցիալական ապահովության հարցերով խորհրդատվական խորհրդի նիստի ժամանակ, ասել է ՌԴ աշխատանքի եւ սոցիալական հարցերի փոխնախարար Լյուբով Ելցովան։
Նրա խոսքով՝ Ռուսաստանի Դաշնությունում մասնագիտական որակավորման, մասնագիտությունների մասին տեղեկատվության համակարգի թարմացման ոլորտում լուրջ փոփոխություններ են ընթանում։ «Խնդիրն է նվազեցնել կրթական հաստատությունների շրջանավարտներին ադապտացնելու գործատուների ծախսերը։ Այսինքն՝ այսօր կա կադրերի պատրաստման շատ լուրջ խնդիր։ Աշխատանքային օրենսգրքում մենք համապատասխան փոփոխություններ ենք կատարում այն մասին, թե ինչ ենք անելու որակավորման գնահատականի հարցում»,- ասել է Ելցովան։
Նա նաեւ նշել է, որ Ռուսաստանում իրականացվում է տեղափոխության ծրագիր։ «Եթե աշխատողը մի տեղից մեկ այլ տեղ է գնում, նա առնվազն 300 հազար ռուբլի է ստանում։ Այս տարի այդ ծրագրին կմասնակցի 2700 մարդ»,- ասել է փոխնախարարը։