Սյունիքի մարզի Կապան քաղաքի բժշկական կենտրոնում նոյեմբերի 20-ին ռումբի մասին կեղծ ահազանգ է տվել դպրոցական երեխա: Այս մասին NEWS.am-ի թղթակցին ասաց հիվանդանոցի տնօրեն Սմբատ Օրբելյանը:
«Դեպքից ժամեր անց ոստիկանությունն արդեն հայտնաբերել էր երեխային, որը կեղծ ռումբի մասին ահազանգ էր տվել: Դպրոցականը ոստիկաններին պատմել է, որ չարաճճիություն անելու համար է ահազանգել ոստիկանություն»,- ասաց Սմբատ Օրբելյանը:
Հիշեցնենք, որ նոյեմբերի 20-ին ժամը 15.22-ին Տարածքային կառավարման եւ արտակարգ իրավիճակների նախարարության ՃԿԱԿ տեղեկատվություն էր ստացվել, որ Սյունիքի մարզի Կապան քաղաքի հիվանդանոցում ռումբ է տեղադրված: Ժամը 15.53-ի դրությամբ իրականացվել էր 95 հիվանդների տարհանում:
Ժամը 17.05-ի դրությամբ աշխատանքները դադարեցվել էին. հիվանդանոցում ռումբ չէր հայտնաբերվել: