Սահմանադրական փոփոխությունների դեմ ձեւավորված «Չեք Անցկացնի» նախաձեռնության նոյեմբերի 30-ին կայանալիք «Ոչ»-ի երիտասարդական ֆորումը չի կայանա իշխանությունների կողմից ճնշումների պատճառով: Այս մասին այսօր` նոյեմբերի 27-ին լրագրողների հետ հանդիպմանը հայտարարեց նախաձեռնության անդամ Արշակ Մուսախանյանը:
«Դաբլ Թրի հյուրանոցը խախտել է վաղը կայանալիք ֆորումի համար վճարովի հիմունքով դահլիճ տրամադրելու պայմանավորվածությունը: Սա առաջին անգամը չէ, որ հյուրանոցները սկզբում համաձայնում, ապա մերժում են իշխանությունների ճնշումների ներքո: Հյուրանոցը վերջին օրով է չեղարկել ֆորումը, որպեսզի մենք հնարավորություն չունենանք այլ վայրում կազմակերպել այն: Մենք ֆինասական եւ ժամանակային մեծ ռեսուրսներ ենք ծախսել այս ֆորումի անցկացման համար, սակայն ֆորումը տապալված է»,- նշեց նախաձեռնության անդամը:
Արշակ Մուսախանյանը նշեց, որ «Այո»-ի քարոզչությունը տապալված է, եւ իշխանությունները հասկանում են, որ ֆորումին մասնակցելու են հազարավոր երիտասարդներ, որոնք հստակ ոչ են ասելու հանրաքվեին:
«Մենք ֆորումի թռուցիկները բաժանել ենք համալսարանների մոտակայքում, եւ մի-երկու ուսանող են ասել, որ այո են ասելու հանրաքվեին: Ոչ-ի նկատմամբ համատարած համակրանք կա: Եւ ֆորումը չեղարկելը կրկին իշխանությունների ջղաձիգ արձագանքն է»,-նշեց նա:
Նախաձեռնության մեկ այլ անդամ, Դավիթ Հովհաննիսյանը նշեց, որ իրենք ֆորումին մասնակցելու էին հրավիրել տարբեր կառույցների երիտասարդական թեւերի ներկայացուցիչներին:
«Մենք այս ֆորումը կազմակերպել էինք, որպեսզի ցույց տանք, թե երիտասարդների շրջանանում ինչպիսի վճռականություն կա «Ոչ»-ի նկատմամբ: Իշխաբությունները սրանից էին վախեցել, որ նման միջոցառումը տեղի չունենա: Իրենք դա կանխել են վերջին օրով, եւ հստակ ծրագիր են ունեցել, որպեսզի միջոցառումը տեղի չունեա»,- ասաց Դավիթ Հովհաննիսյանը:
Նա հավելեց, որ հյուրանոցի անձնակազմը բաց տեքստով ասել է, որ իրենց հրահանգված է եղել չեղյալ հայտարարել ֆորումը:
«Մեզ ասացին, որ հրահանգ է եղել վերեւից, որ դահլիճ չտրամադրեն մեզ: Իրենք էլ վախեցել են վտանգել իրենց բիիզնեսը»,-ասաց Դավիթ Հովհաննիսյանը:
Նախաձեռնության անդամները նշեցին, որ իրենք այլ միջոցառումներ են նախատեսում, իսկ մարզային հանդիպումները շարունակվում են:
