Սահմանադրական փոփոխություններ նախաձեռնելուց առաջ պետք է պարզել՝ ովքեր են պատասխանատու ներկայիս վատթար վիճակի համար եւ պատժել նրանց: Նման կարծիք է հայտնել «Հասարակական կարծիքի ուսումնասիրության կենտրոնի» նախագահ Թամարա Գեւորգյանը։
«Խոսում ենք ամեն ինչից, բայց ոչ ներկայից: Այսօր խոսում ենք ապագայից՝ առանց ներկան հաշվի առնելու: Երբ խոսում ենք պետության մասին, չի կարելի պետության մեջ փողոցային մոտեցումներով առաջնորդվել, չի կարելի մոռանալ այն ամենի մասին, ինչ նախկինում եղել է: Ամենասարսափելին այն է, որ իշխանություններն ասում են՝ գիտեինք, որ մի բան այն չէ, բայց էս Սահմանադրությունը մեր ոտքն ու ձեռքն է կապել: Ամոթ է, չկա նման բան»,- այսօր՝ նոյեմբերի 27-ին, «Այո»-ի եւ «Ոչ»-ի ռեալիթի շոուի շրջանակում Արմավիրի մարզի Ապագա գյուղի բնակիչների հետ հանդիպմանն ասել է Թամարա Գեւորգյանը:
ՀԿ նախագահի խոսքով՝ անհրաժեշտ է պատժել նրանց, որոնք մեղավոր են ներկայիս ճգնաժամային իրավիճակի համար, հետո մտածել Սահմանադրական փոփոխությունների մասին:
«Ասում են՝ խորհրդարանական համակարգ, բայց մենք չունենք կուսակցություններ: Բոլորիս է հայտնի, թե ովքեր են այդ կուսակցությունները, պատգամավորները, որոնք ԱԺ են մտնում: Նման երկրում չի կարող կառավարման խորհրդարանական համակարգ լինել»,- ասել է:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին:
