Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում անցկացված դռնփակ դատական նիստերում արդեն կայացվել է նոյեմբերի 25-ին Ազգային անվտանգության ծառայության կողմից վնասազերծված, ծանր հանցագործություններ նախապատրաստվելու մեջ կասկածվող 21 անձանցից 6-ի կալանքի որոշումը:

NEWS.am-ի թղթակիցը հաղորդում է, որ արդեն կալանավորվել են ազատամարտիկ Խաչիկ Ավետիսյանը, Մարինե եւ Ասյա Մկտչյանները, ըստ ԱԱԾ-ի՝ խմբի պարագլուխ համարվող Արթուր Վարդանյանը, խմբի անդամներից Սրբուհին ու Դավիթը:

Ավելի վաղ NEWS.am-ը հաղորդել էր, որ այսօր՝ նոյեմբերի 27-ին, 21 ձերբակալվածներին բերել են դատարան՝ ձեռնաշղթաներով, ոստիկանների հսկողությամբ: Դատարանում նույնպես ուժեղացված հսկողություն է։ Բացի փաստաբաններից դատարան են եկել ձերբակալվածների հարազատները:

Դռնփակ դատական նիստերն անցկացնելու են մի քանի տարբեր դատավորներ: Նախատեսվում է, որ այսօր դատարանը պետք է որոշում կայացնի բոլոր 21 անձանց խափանման միջոցի վերաբերյալ:

Հիշեցնենք, որ նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում  հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ,  փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են: Կասկածյալների ընդհանուր թիվը 19–ն է, երեկվանից մայրաքաղաքում, Շիրակում եւ Կոտայքում զինված հսկողություն են իրականացնում իրավապահները` ենթադրաբար մյուս կասկածյալներին գտնելու նպատակով:

ՀՀ ԱԱԾ քննչական վարչությունում   հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, կատարվում է նախաքննություն: