Սահմանադրական փոփոխություններն առճակատում չեն իշխանության եւ ընդդիմություն միջեւ: Այսօր՝ նոյեմբերի 27-ին, «Այո»-ի եւ «Ոչ»-ի ռեալիթի շոուի շրջանակում Տավուշի մարզի Բերդ քաղաքի բնակիչների հետ հանդիպմանը նման կարծիք է հայտնել ՀՅԴ անդամ Արթուր եղիազարյանը:
«ՀՅԴ-ն միշտ էլ հայտարարել է, որ կողմ է կառավարման խորհրդարանական համակարգին: Մեր քաղաքական ուժը ներկայացրել է առաջարկներ, որոնք ընդունվել են Սահմանադրական բարեփոխումների մասնագիտական հանձնաժողովի կողմից: Հետեւաբար, մենք կողմ ենք այս նախագծին: Եթե նույնիսկ հաջորդ խորհրդարանում մեր քաղաքական ուժից ոչ մի պատգամավոր չլինի, մենք պաշտպանելու ենք այս նախագիծը»,- ասել է նա:
Արթուր Եղիազարյանի խոսքով՝ Սահմանադրական բարեփոխումների մասնագիտական հանձնաժողովը երկու տարի աշխատել է այս նախագծի վրա, իշխանության եւ ընդդիմության ներկայացուցիչներն առաջարկներ են ներկայացրել:
«Իդեալական ոչինչ չկա: Եթե չընդունենք նախագիծը, մնում է այնպես, ինչպես մնում է... Հնարավոր չէ, որ բոլորին յուրաքանչյուր կետ բավարարի, կարեւորը, որ հիմնական կետերը հավանության արժանանան ձեր կողմից»,- նշել է նա:
Արթուր Եղիազարյանը հիշեցրեց նորից, որ Սահմանադրական փոփոխություններով կառավարման խորհրդարանական համակարգ է առաջարկվում, որը լայն հնարավորություններ է ընձեռնում քաղաքական ուժերի եւ հասարակության համար:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին: