Երեւանում նոյեմբերի 25–ին վնասազերծված` ծանր հանցագործություն կազմակերպելու մեջ կասկածվող խմբի անդամներից Ասյա եւ Մարինե Մկրտչյան քույրերը, ըստ նրանց մոր, քաղաքացիական գործունեությամբ չեն զբաղվել:
«Իրավապահ մարմինների ներկայացուցիչները մեր տուն երբեք չեն եկել, ես ոչ մեկին չեմ տեսել, իմ երեխեքը ոչ մի անգամ ոչ մի ցույցի չեն մասնակցել, նույնիսկ համերգների չեն գնացել մասնակցելու»,- NEWS.am-ի հետ զրույցում ասաց նրանց մայրը՝ Անահիտ Մկտչյանը:
Մոր խոսքով՝ թե իրենք, թե քույրերին ճանաչողները շոկի մեջ են եղել, երբ լսել են նրանց ձերբակալման մասին լուրը. «Իմ երեխեքին անմեղ տեղը տարել են: Ասող-խոսող, ուրախ-զվարթ աղջիկներ են եղել, ոչ մեկ իրանցից ոչ մի վատ բան չի տեսել, էսօր բոլորը շոկի մեջ են, թե ինչի էդ երեխեքը պիտի գնային, ընկնեին գաղութները: Թե ինչի հիման վրա, անհասկանալի ա մեզ համար»:
Նշենք, որ Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանի որոշումներով քույրերն այսօր՝ նոյեմբերի 27-ին, կալավորվել են:
Հիշեցնենք, որ նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են: Կասկածյալների ընդհանուր թիվը 19–ն է, երեկվանից մայրաքաղաքում, Շիրակում եւ Կոտայքում զինված հսկողություն են իրականացնում իրավապահները` ենթադրաբար մյուս կասկածյալներին գտնելու նպատակով:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, կատարվում է նախաքննություն: