Ավստրալական Կանբերրայում համաշխարհային ռեկորդ են սահմանել արհեստական եղեւնու վրա սուրբ ծննդյան լույսերի թվով: Այդ շարժման հեղինակը Դեվիդ Ռիչարդսն է: Նա տոնական 21 մետրանոց ծառի վրա 518 838 լուսադիոդային լամպ է տեղադրել, տեղեկացնում է Gazeta-ն` վկայակոչելով Canberra Times-ին:
Ռեկորդի համար օգտագործվել է այն եղեւնին, որը մինչեւ 2011-ը սուրբ ծննդյան տոնակատարությունների ընթացքում զարդարում էր քաղաքի կենտրոնը:
Ինչպես ասել է Ռիչարդսը, ինքը հիացած է այս նվաճումով: Ավստրալացու խոսքով, հաջողվել է գերազանցել նախորդ ռեկորդը, որը սահմանվել էր Ճապոնիայում, ինչպես նաեւ օգնել հարյուր հազարավոր դոլարներ հավաքել բարեգործության համար: Միջոցառմանը մասնակցել են ճարտարապետներ, ինժեներներ, դիզայներներ եւ կամավորներ:
Լույսերի վառման արարողությունը տեղի է ունեցել ուրբաթ` տեղի բնակիչների եւ Գինեսի ռեկորդների գրքի պաշտոնական ներկայացուցչի ներկայությամբ, որը հաստատել է նոր համաշխարհային նվաճումը, տեղեկացնում է Guinness World Records-ը:
