Սահմանադրական փոփոխությունների գործընթացով խախտվել են գործող Սահմանադրության մի ամբողջ շարք հոդվածներ։ Այդ մասին Ազատության հրապարակում հրավիրած սակավամարդ հանրահավաքում հայտարարել է ԱԻՄ նախագահ Պարույր Հայրիկյանը։
Վերջինս ներկայացրեց սահմանադրական փոփոխություններին «ոչ» ասելու իր հիմնավորումները, ինչից հետո հավաքվածները Հայաստանի եւ Եվրամիության դրոշներով եւ պաստառներով, մայթերով քայլելով շարժվել են դեպի նախագահական նստավայր։
Նախագահական նստավայրի մոտ Պարույր Հայրիկյանը բարձրախոսով դիմեց Սերժ Սարգսյանին՝ կոչ անելով կասեցնել հանրաքվեն։ «Այսօր դուք ապաշխարելու վերջին հնարավորությունն ունեք։ Պիտի կասեցնեք այս խուժան հանրաքվեն, մեր ժողովրդին չզրկեք թագավոր ունենալու հնարավորությունից»,- ասել է Հայրիկյանը։