Համացանցում ռուսական Սու-24 ռմբակոծիչի կործանման արագ լուսաբանումն ու օդաչուների վայրէջքի վայր զինյալների արագ հասնելը վկայում են ինքնաթիռի ոչնչացումը նախապես ծրագրելու մասին: Այս մասին հայտարարել է Ռուսաստանի օդատիեզերական ուժերի գլխավոր հրամանատար, գեներալ-գնդապետ Վիկտոր Բոնդարյովը:
Նա նշել է, որ թուրքական ՌՕՈՒ-ի F-16 ինքնաթիռը ռուսական ռմբակոծիչը խոցել է Մոսկվայի ժամանակով 10:24-ին, իսկ արդեն 1.5 ժամ անց օդանավի կործանման տեսանյութը հայտնվել է թուրքական մասնավոր հեռուստաալիքներից մեկի YouTube-ի ալիքում:
«Օպերատորն իմացել է ժամանակն ու վայրը, որտեղից հնարավոր կլիներ բացառիկ կադրեր անել»,- հայտարարել է Բոնդարյովը: ՌԲԿ-ի փոխանցմամբ, նա նաեւ ընդգծել է օդաչուների վայրէջքի վայր զինյալների օպերատիվ տեղ հասնելու փաստը: «Այս փաստերը վկայում են ինքնաթիռի ոչնչացումը նախապես ծրագրելու մասին»,- ընդգծել է նա:
Ավելի վաղ Բոնդարյովը հայտարարել էր, որ թուրքական ՌՕՈՒ-ն նախապես ծրագրել է ռուսական Սու-24-ի դեմ հարձակումը: Նա ընդգծել է որ թուրքական F-16-ը ժամանակ չէր ունենա հերթապահության վայրից հրթիռի արձակման վայր հասնելու համար: