Քիչ առաջ Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարան է գնացել Մարդու իրավունքների պաշտպանի տեղակալ Արմեն Գրիգորյանը:
NEWS.am-ի թղթակցի հետ զրույցւոմ ՄԻՊ տեղակալն ասել է, որ դատարան է գնացել՝ տեսնելու, թե որքանով են պաշտպանվում ծանր հանցագործություն կատարելու համար կասկածվող զինված խմբի անդամների իրավունքները՝ նրանց նկատմամբ խափանման միջոցը սահմանելիս:
NEWS.am-ի հարցին՝ արդյոք ՄԻՊ տեղակալը դատարան է գնացել ահազանգի հետքերով, Արմեն Գրիգորյանը պատասխանել է, որ ահազանգ չի եղել, ինքն այնտեղ է սեփական նախաձեռնությամբ:
Նշենք, որ զինված խմբի 21 անդամների նկատմամբ խափանման միջոցը որոշելու նպատակով նրանց բոլորին այսօր առավոտից տարել են դատարան: Ժամը 23:00-ի դրությամբ կալանքի որոշում է կայացվել նրանցից 19-ի նկատմամբ:
Հիշեցնենք, որ նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են: Կասկածյալների ընդհանուր թիվը 21–ն է:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, կատարվում է նախաքննություն:
Լուսանկարը՝ Արսեն Սարգսյանի/NEWS.am