Երեւանի Կենտրոն եւ Նորք Մարաշ վարչական ընդհանուր իրավասության դատարանում քիչ առաջ ավարտվեց նոյեմբերի 25-ին Ազգային անվտանգության ծառայության կողմից վնասազերծված, ծանր հանցագործություններ նախապատրաստվելու մեջ կասկածվող 21 անձանց խափանման միջոցը որպես կալանք փոխելու դատական նիստերը (ֆոտոռեպորտաժ): Այս մասին դատարանից հայտնեց NEWS.am-ի թղթակիցը։
Նշենք, որ նոյեմբերի 27-ի կեսօրից դատարանը դռնփակ նիստեր է անցկացնում: Ամեն ինչ իրականացվում էր գաղտնիության պայմաններում, փաստաբաններն անգամ հրաժարվում էին ասել, թե ովքեր են իրենց պաշտպանյալները:
Մեղադրյալների ծնողներն ու հարազատները մինչեւ վերջ դատարանի ետնամուտքի մոտ են եղել` հույս ունենալով, որ կարող են տեսնել նրանց: Ի դեպ կանանց դատարանից Աբովյան քրեակտարողական հիմնարկ են տեղափոխել մոտ մեկ ժամ առաջ, իսկ տղամարդկանց` ավելի ուշ:
Ինչպես ավելի վաղ հայտնել էինք, մոտ մեկ ժամ առաջ դատարան էր այցելել նաեւ Մարդու իրավունքների պաշտպանի գրասենյակի ներկայացուցիչները, որոնք խոստացել էին իրենց արձանագրած խախտումների մասին հանդես գալ հայտարարությամբ:
Հիշեցնենք, որ նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են: Կասկածյալների ընդհանուր թիվը 19–ն է, երեկվանից մայրաքաղաքում, Շիրակում եւ Կոտայքում զինված հսկողություն են իրականացնում իրավապահները` ենթադրաբար մյուս կասկածյալներին գտնելու նպատակով:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, կատարվում է նախաքննություն: