Սյունիքի մարզպետ Սուրիկ Խաչատրյանը վստահ է, որ նոյեմբերի 25-ին ԱԱԾ-ի կողմի զինված խմբին վնասազերծելը բեմականացված չի եղել:
«Ոնց կարող էր բեմականացված լինել: Թերահավատ եք: Քննություն է ընթանում հիմա, ամեն ինչ կիմանաք, ինչի՞ եք վռազում»,- այս մասին, այսօր՝ նոյեմբերի 28-ին, լրագրողների հետ զրույցում նշեց Սուրիկ Խաչատրյանը:
NEWS.am-ի դիտարկմանը, թե այդ խմբում կան ազատամարտիկներ, այդ թվում Խաչիկ Ավետիսյանը, մարզպետն արձագանքեց. «Ես չեմ ճանաչում Խաչիկ Ավետիսյանին, բայց ազատամարտիկը խի՞ էր ուզում վնաս տալ իր պետությանը»:
Նշենք, որ երեկ՝ նոյեմբերի 27-ին, Երեւանի Կենտրոն եւ Նորք-Մարաշ վարչական շրջանների ընդհանուր իրավսության դատարանի որոշմամբ զինված խմբի 21 անդամները կալանավորվել են: Նրանց թվում է նաեւ ազատամարտիկ Խաչիկ Ավետիսյանը:
Հիշեցնենք, որ նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են: Կասկածյալների ընդհանուր թիվը 19–ն է, երեկվանից մայրաքաղաքում, Շիրակում եւ Կոտայքում զինված հսկողություն են իրականացնում իրավապահները` ենթադրաբար մյուս կասկածյալներին գտնելու նպատակով:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, կատարվում է նախաքննություն: