Դեկտեմբերի 6-ին բոլոր սյունեցիները «Այո» են ասելու Սահմանադրական փոփոխություններին: Այսօր՝ նոյեմբերի 28-ին, լրագրողների հետ զրույցում նման համոզմունք է հայտնել Սյունիքի մարզպետ Սուրիկ Խաչատրյանը, որը Սյունիքում «Այո»-ի քարոզարշավի գրասենյակի ղեկավարն է:
«Այո-ի քարոզարշավը Սյունիքում ընտիր է անցնում: Եկեք Սյունիք եւ կհամոզվեք՝ ինչ ընտիր է անցում: Ես համոզված եմ, որ սյունեցիները այո են ասելու սահմանադրական փոփոխություններին»,-ասաց նա:
Սուրիկ Խաչատրյանի խոսքով՝ իրենց մարզում ընդդիմությանը ոչ ոք չի վստահում, ինչի ապացույցը, ըստ նրա, «Նոր Հայաստան» հանրային փրկության ճակատի սակավամարդ հանրահավաքն էր:
Նշենք, որ դեկտեմբերի 6-ին տեղի կունենա Սահմանադրական փոփոխությունների նախագծի հանրաքվեն: Նախագծով նախատեսվում է անցում կատարել խորհրդարանական կառավարման համակարգի:
