Այսօր Հյուսիսային պողոտայում երեւանցիները կարող են համտեսել գինու մի քանի տասնյակ տեսակներ: Նոյեմբերի 28-29-ը այնտեղ մեծ տոնավաճառ- համտեսում է լինելու: Այստեղ հնարավոր կլինի համտեսել ցանկացած ճաշակի գինի՝ կարմիր ու սպիտակ, չոր ու քաղցր ու նույնիսկ մրգային՝ հայկական նռներից, ծիրանից ու բալից (ֆոտոռեպորտաժ)
Ինչպես լրագրողների հետ զրույցում նշեց ՀՀ գյուղատնտեսության փոխնախարար Ռոբերտ Մակարյանը, նախարարության ու Երեւանի քաղաքապետարանի համատեղ ջանքերով կազմակերպված տոնավաճառում ներկայացված են 23 գինի արտադրողների՝ ընդ որում ոչ միայն խոշոր ընկերությունների, այլեւ Վայոց Ձորի անհատ ձեռներեցների ապրանքատեսակներ:
Այս տոնավաճառի նպատակը, ինչպես նշեց փոխնախարարը, տեղական արտադրողներին ու ձեռներեցներին նրանց ապրանքների իրացման գործում աջակցելն է: Միջոցառումը կարող է հետաքրքիր լինել նաեւ Հայաստան ժամանած զբոսաշրջիկներին՝ նրանց համար դա հայկական գինիները համտեսելու ու տեղական արտադրության մասին ավելի շատ բան իմանալու հոյակապ հնարավորություն է: Իսկ հայերը, ինչու ոչ, նույնպես կկարողանան ավելի շատ բան իմանալ այն մասին, թե ինչ գինիներ են արտադրվում երկրում ու ինչ համ ունեն. գուցե դա կբարձրացնի հետաքրքրությունը տեղական ապրանքների նկատմամբ, որոնք որպես կանոն չեն զիջում ներմուծվածներին:
Երեւանի փոխքաղաքապետ Դավիթ Օհանյանն իր հերթին նշեց, որ քաղապետարանն ու գյուղատնտեսության նախարարությունը արդեն երկար տարիներ է համագործակցում եւ համատեղ տոնավաճառներ են կազմակերպում մեկ նպատակով՝ աջակցել տեղական արտադրությունը: Քաղաքապետարանը ու գյուղատնտեսության նախարարությունը նաեւ հայտարարել են, որ տեղական ապրանքների՝ ոչ միայն գինիների, այլեւ գյուղատնտեսական այլ ապրանքների գովազդմանն ուղղված միջոցառումներ են ծրագրվում նաեւ 2016 թ: