ՀՀԿ-ում կեսն էլ իրանց քյարի համար են եկել, որոնք չէին էլ իմանում, թե ինչ է ՀՀԿ-ն ու այսօր ավելի բարձր պաշտոն են զբաղեցնում: Այս մասին, այսօր՝ նոյեմբերի 28-ին, սահմանադրական փոփոխությունների «Այո և ոչ» հեռուստանախագծի շրջանակներում Արմավիրի մարզի Մրգաշատ գյուղում հանդիպման ժամանակ նշել է ԱԺ ՀՀԿ խմբակցության պատգամավոր Վարդան Այվազյանը:
«ՀՀԿ-ում կան իրանց մտածողությամբ մարդիկ, կեսն էլ իրանց քյարի համար են, ես անդամ եմ 97-ից, կեսից ավելը չէին իմանում՝ ինչ ա ՀՀԿ-ն, որոնք այսօր ավելի բարձր պաշտոն են զբաղեցնում»,-ասել է նա:
Բնակիչներից մեկի հարցին, թե դուք չեք ամաչո՞մ, որ էդ հեղինակությունների, թաղային տղերքի կողքին եք նստում Ազգային ժողովում, Վարդան Այվազյանը պատասխանել է. «Չեմ ամաչում, որովհետև ՀՀԿ-ն թե՛ վատի, թե՛ լավի տերն ա, որ քրֆում են, ես դրանից չեմ ամաչում: Ժամանակին էլ եղել եմ ՀՀՇ կազմակերպության անդամ, մեծից փոքր ՀՀՇ էին, չորս անգամ նույն ընտրատարածքից եմ ընտրվել՝ պառնիկի խիարի պես չեմ եղել ոմանց պես»:
Վարդան Այվազյանը վստահություն է հայտնել, որ սահմանադրական փոփոխություններից հետո մեծամասնական ընտրակարգը դուրս կգա, որով խորհրդարան են անցնցում թաղային հեղինակությունները: Հարցին, թե որն է դրա երաշխիքը, որ մականունավոր մարդիկ չեն լինի խորհրդարանում, ՀՀԿ-ական պատգամավորը պատասխանել է. «Լավ են՝ վատ են, մեր հասարակության մեջ կան: Մեծամասնականը դրա համար հանում ենք, իսկ հնով՝ մնալու է: Ընտրողը դու ես, գալիս նայում ես, որ ցուցակում տենց մարդիկ կան, էդ մարդկանց ձեն մի տուր, լավին ձայն տուր: Դու պիտի տեր կանգնես քո ընտրությանը: Հիմա իշխանությունը փոխելու համար պառլամենտում ընդամենը պիտի ունենաս մեծամասնություն»:
