Հայաստանին անհրաժեշտ է նոր շուկաներ փնտրել գինի արտահանելու համար, որպեսզի կախում չունենա մեկ -երկու շուկաներից: Լրագրողներին հետ զրույցում նման տեսակետ է արտահայտել ՀՀ Գյուղատնետսության փոխնախարար Ռոբերտ Մակարյանը:
Նրա խոսքով, այլ երկրներ արտահանվող հայկական գինիների ծավալները մեծացնելու մեծ ներուժ կա, առավել եւս հիմա՝բերքառատ տարվանից հետո: Սակայն որքա՞նով մրցունակ կլինեն հայկական գինիները այլ երկրներում: Փոխնախարարի խոսքով հոկտեմբերին Երեւանում անցկացված միջազգային գյուղատնտեսական ցուցահանդեսի ընթացքում հայկական գինիները համտեսել են Չիլիից եկած մասնագետները (իսկ Չիլին ինչպես գիտեք հայտնի է իր գինիներով ), ու նրանք դրական են արտահայտվել հայկական գինիների որակի ու համի մասին: Ռոբերտ Մակարյանը ինքը նույնպես վստահ է, որ հայկական գինիների բոլոր տեսակները կկարողանան իրենց արժանի տեղը գտնել արտասահմանյան շուկաներում, ի վերջո, Հայաստանում կան գործարաններ, որոնք հագեցած են այնպիսի տեխնոլոգիաներով, որոնցով միջազգային ոչ բոլոր հայտնի ընկերությունները կարող են պարծենալ:
Այս պահին հայկական գինիներն արտահանվում են հիմնականում Ռուսաստան ու մի քանի եվրոպական երկրներ: Սակայն, ինչպես նշեց Ռոբերտ Մակարյանը, արտահանման շուկաների դիվերսիֆիկացումը հայ արտադրողներին հնարավորություն կտա կախում չունենալ մեկ –երկու շուկաներից: Այս պահին փոխադարձ հետաքրքրություն կա օրինակ Հնդկաստանի հետ: Ինչպես նշեց փոխնախարարը, փետրվարին գյուղատնտեսության նախարարը ծրագրում է այցելել Հնդկաստան, ու հնդկական կողմը շատ շահագրգռված է հայկական գինիներ, կոնյակ ու այլ ոգելից խմիչքներ ներմուծելու հարցում: Պատվիրակության կազմում կլինեն նաեւ գինեգործներ ու ձեռնարկությունների ներկայացուցիչներ, որոնք հնարավորություն կստանան ներկայացնել Հնդկաստանին իրենց արտադրանքը ու գուցե նաեւ փոխշահավետ գործնական համաձայնագրեր կնքել:
