«Ժառանգություն» կուսակցության առաջնորդ Րաֆֆի Հովհաննիսյանը հերքել է տեղեկությունները, թե իրենք որոշ տեղամասերում ՀՀԿ-ին են վաճառել տեղամասային ընտրական հանձնաժողովներում իրենց տեղերը:
Լրագրողների հետ զրույցում անդրադառնալով այդ թեմային, Րաֆֆի Հովհաննիսյանն ասել է. «Այնտեղ ասել են, որ ես եմ վաճառել: Ավելի պարզունակ զրպարտություն, քան դա, չի կարող լինել, եւ ես չեմ հասկանում որեւէ ներողություն: Նա, ով ընթերցի այդ նույն հոդվածը, այդ նույն թերթի 4-րդ էջում կտեսնի, որ դա այն 118 տեղերից մեկն էր, որտեղ մենք չհասցրեցինք ներկայացնել մեր ներկայացուցչին, ուստի եւ հանձնաժողովի նախագահի կողմից վիճակահանությամբ նշանակվեց ինչ-որ մեկը, որը մեզ հետ կապ չունի: Դա իհարկե մեր բացթողումն է, մենք 2000-ից 118 տեղ չկարողացանք մեր ներկայացուցչին ներկայացնել»:
«Ժառանգության» առաջնորդի խոսքով, ճշմարտությունն այն է, որ եթե վաճառք կա, վաճառք բառը պատկանում է այս կեղծ իշխանություններին:
Ավելի վաղ NEWS.am-ը հայտնել էր, որ «Ժողովուրդ» թերթը գրել է, որ Րաֆֆի Հովհաննիսյանը կոնկրետ Սյունիքի հանձնաժողովի անդամների տեղերն արդեն վաճառել կամ նվիրել է Հանրապետական կուսակցությանը: «Ժողովուրդ»-ին տեղեկություններ հասան այն մասին, որ թիվ 37 ընտրատարածքի մի շարք տեղամասերում «Ժառանգություն» կուսակցության կողմից նշանակված ՏԸՀ անդամներն իրականում այս կուսակցության հետ կապ չունեն, ավելին՝ նրանց մեջ անգամ կան այնպիսիք, որոնք օրաթերթի հետ զրույցում ուղղակի հայտարարեցին, որ իրենք ՀՀԿ անդամ են եւ այո-ի կողմնակից»,-գրել է թերթը:
