«Նոր Հայաստան» հանրային փրկության ճակատն այսօր՝ նոյեմբերի 28-ին, Գյումրի քաղաք է գնացել մի խնդրանքով, որպեսզի գյումրեցիները մասնակցեն դեկտեմբերի 1-ին, ժամը 18:00-ին, Երեւանի Ազատության հրապարակում կայանալիք համապետական հանրահավաքին, որով սկիզբ է դրվելու իշխանափոխության գործընթացին: Այս մասին իր ելույթում նշել է «Ընդդիմության միասնական շտաբի» պետ Ժիրայր Սեֆիլյանը:
«Մենք մի խնդրանքով ենք եկել ձեր դուռը, այս անգամ վերջին անգամ: Բոլորս գիտենք՝ ինչպիսի համակարգ է կանգնած մեր դեմ, մեր դեմ բռնատիրություն է կանգնած: Բռնատիրությունը միայն ժողովրդական ընդվզմամբ է հնարավոր հեռացնել, ուրիշ ճանապարհ ես չեմ պատկերացնում: Իմ հորդորն է, իմ խնդրանքն է մի անգամ մեր ժողովուրդը լսի նոր ձեւավորված քաղաքական միավորմանը՝ «Նոր Հայաստան» հանրային փրկության ճակատին»,-ասել է Սեֆիլյանը:
Ժիրայր Սեֆիլյանը համոզմունք է հայտնել, որ գործը դեկտեմբերի 6-ին կայանալիք Սահմանադրական փոփոխություններին չի հասնի:
«Ընդվզումը ոչ թե ինչպես միշտ ընտրությունների հաջորդ օրը պետք է լինի, այլ դեկտեմբերի 1-ից: Լուծումը սրա մեջ է լինելու, ես համոզված եմ, որ մինչեւ դեկտեմբերի 6 չենք հասնելու, լուծումը մինչեւ էդ տալու ենք»,-ասել է Սեֆիլյանը:
«Ընդդիմության միասնական շտաբի» պետը եւս մեկ անգամ գյումրեցիներին հորդորել է դեկտեմբերի 1-ի հանրահավաքին՝ հավելելով, որ Երեւան գալ ցանկացող գյումրեցիներին տրանսպորտային միջոցներ կտրամադրվեն:
Նշենք, «Նոր Հայաստան» հանրային փրկության ճակատի կազմում են «Ժառանգություն», «Ժողովրդավարական Հայրենիք» կուսակցությունները, ԱԻՄ-ը՝ դիտորդի կարգավիճակով, ինչպես նաեւ՝ «Հիմնադիր խորհրդարանը» եւ «Ոտքի՛, Հայաստան» քաղաքացիական նախաձեռնությունը:
«Ընդդիմության միասնական շտաբը» նախատեսում է դեկտեմբերի 1-ից անհնազանդության ակցիաների միջոցով իշխանափոխություն անել եւ ստեղծել ժամանակավոր կառավարություն: