Էքստրասենս Անի Մաջնունյանի սպանության մեջ մեղադրվող՝ «Յանուս» թատրոնի գեղարվեստական ղեկավար Մուշեղ Մխիթարյանի կալանքի ժամկետը երկու ամսով երկարաձգվել է: Այս մասին NEWS.am-ի հետ զրույում ասաց Մխիթարյանի պաշտպան Մարինե Ֆարմանյանը:

Ըստ պաշտպանի՝ կալանքի ժամկետը երկարաձգելու մասին քննիչի միջնորդությունը քննարկվել եւ բավարարվել է, որի համար էական նշանակություն է ունեցել այն հանգամանքը, որ Մուշեղ Մխիթարյանի դեմ մի վկա մեղադրական ցուցմունք է տվել:

«Քննիչը միջնորդություն ներկայացրեց, որ մի վկա կա, որը ցուցմունք է տալիս Մուշեղի դեմ: Այնպիսի իրավիճակ է, որ վկան գրեթե րոպեներով նկարագրում է արարքի կատարումը: Իհարկե իմ պաշտպանյալը դրա դեմ մի շարք հիմնավորումներ է ներկայացրել, եւ մենք պաշտպանվելու ենք այդ մեղադրանքից, բայց հենց նման պարագայում կալանավորման ժամկետը երկարացնելու միջնորդությունը բավարարվեց»,-նշեց պաշտպանը՝ հավելելով, որ առաջիկայում նաեւ սպասվում են մի շարք փորձաքննությունների եզրակացության արդյունքներ:

Մարինե Ֆարմանյանի խոսքով՝ նման հանցագործությունների դեպքում ընդունված պրակտիկա է կալանավորումը եւ կալանավորման ժամկետը երկարաձգելը, որպեսզի կասկածյալը ազդեցություն չունենա նախաքննության վրա, սակայն այս դեպքում նախաքննական մարմինը պատշաճ հիմնավորումներ առաջ չի քաշում:

 «Ինձ որպես փաստաբանի սա նորամալ չի թվում, բայց կիրառվող պրակտիկա է: Սակայն նախաքննության մարմինը քրեական դատավարության 135-րդ հոդվածով պարտավոր է հիմնավորել, որ Մուշեղը կարող է թաքնվել նախաքննական մարմնից կամ խոչընդոտել նախաքննության աշխատանքներին, կամ կեղծել որոշակի ապացույցներ, կամ որեւէ կերպ ազդել գործին մասնակցող անձանց վրա: Մի խոսքով՝ այն,  ինչը որ դատավարական կարգով հիմնավորում ունի, մենք դեռեւս իրականում չենք տեսնում»,-ասաց պաշտպանը:

Ավելի վաղ տեղեկացրել էինք, որ 2015թ. օգոստոսի 5-ին Երեւանի Մազմանյան 5 շենքի թիվ 20 բնակարանում հայտնաբերվել է «6-րդ զգայարան» հաղորդաշարի էքստրասենս, 53-ամյա Անի Մաջնունյանի դին՝ բազմաթիվ ծակած-կտրած վնասվածքներով:

20-ամյա Մուշեղ Մխիթարյանին, մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով (սպանություն` զուգորդված ավազակությամբ):