Գյումրիի բնակչունի, 52-ամյա Ռուզաննա Տ.-ն մեղադրվում է սուտ մատնություն անելու մեջ: Այս մասին NEWS.am-ը տեղեկացավ Դատական տեղեկատվական համակարգից:
Ըստ մեղադրական եզրակացության՝ Ռուզաննա Տ.-ն սեպտեմբերի 17-ին զրուցել է արտասահմանում գտնվող աղջկա հետ եւ տեղեկացել, որ նա հոկտեմբերին 10-ին է վերադառնալու Հայաստան: Քաջ գիտակցելով, որ մինչեւ աղջկա վերադարձը չի կարող վերադարձնել նրա ուղարկած 40 հազար ՌԴ ռուբլին ժամանակ շահելու նպատակով նույն օրը երեկոյան Ռուզաննան գնացել է դստեր տուն, խառնել բնակարանի գույքը, վնասել մուտքի դուռը եւ դռան շրջանակը: Հաջորդ օրը գիտակցելով, որ իր տրամադրած տեղեկատվությունը կեղծ է, ոստիկանության բաժնում տվել է իրականությանը չհամապատասխանող հաղորդում. իբր սեպտեմբերի 16-18-ն ընկած ժամանակահատվածում անհայտ անձը տեխնիկական միջոցի գործադրմամբ բացել է աղջկա բնակարանի մուտքի դուռը եւ հյուրասենյակի պահարանից գողացել 40 հազար ՌԴ ռուբլի:
Ռուզաննա Տ.-ին մեղադրանք է առաջադրվել Քրեական օրենսգրքի 333-րդ հոդվածի 1-ին մասով: Խափանման միջոց է ընտրվել ստորագրություն չհեռանալու մասին: