Ամենակարեւորը խնդիրն այսօր Արցախի անկախությունն է եւ հայրենիքի սահմանների պաշտպանությունը: Այս մասին այսօր՝ նոյեմբերի 28-ին, «Եդվյալ ազատամարտիկների» միության 4-րդ արտահերթ համագումարի ժամանակ ասել է միության նախագահ Ռուբեն Գեւորգյանը:
«Երկրում արձանագրվող սոցիալական ամենածանր փաստն էլ հացի խնդրի հետ կապված ամենադառը իրողությունն է: Հայրենասիրություն չի նշանակում սիրել միայն հայրենիքը, անհամեմատ ավելի բարդ բան է, հայրենիքից իր անբաժանելիության գիտակցումն է, երջանիկ ու դժբախտ օրերը նրա հետ անբաժանելիորեն վերապրելը: Այսօր նեղանալ, ըմբոստանալ եւ հեռանալ երկրից, երբ երկիրը վտանգի մեջ է, ամոթ է ու ծիծաղելի: Ի վերջո, հայրենիքը նեղանալու իրավունք ունի մեզանից մեր կիսատ թողած գործերի համար»,- ասել է Ռուբեն Գեւորգյանը:
Ազատամարտիկի խոսքով՝ դատապարտելի են բոլոր տեսակի ընդվզումները, որոնք կխաթարեն երկրի ներքաղաքական անդորրը եւ իրենց գործողություններով երկրում կստեղծեն անհամերաշխ մթնոլորտ, եւ պառակտված հասարակություն:
«Այսօր հարկավոր է ձերբազատվել ներքաղաքական բոլոր խմորումներից եւ գիտակցել, որ սոցիալական ամենալուրջ խնդիրներից առավել կա հողի խնդիր»,- նշել է նա: