Արարատի մարզի Սուրենավան գյուղում գյուրզա տեսակի օձի խայթոցից 54-ամյա Կարինե Հարությունյանի մահվան դեպքի առթիվ քրեական գործ է հարուցվել բժշկական օգնություն եւ սպասարկում իրականացնողների կողմից մասնագիտական պարտականությունները չկատարելու կամ ոչ պատշաճ կատարելու հոդվածով`(ՀՀ Քրեական օրենսգրքի 130-րդ 2-րդ մաս): Այս մասին NEWS.am-ի հետ զրույցում հայտնեց մահացած կնոջ պաշտպան Տաթեւիկ Սիրադեղյանը:
Պաշտպանի խոսքով՝ դեռեւս օգոստոսի 30-ին Էրեբունի եւ Նուբարաշեն վարչական շրջանների քննչական բաժնի քննիչը քրեական գործի հարուցումը մերժելու մասին որոշում էր կայացրել՝ հանցակազմի բացակայության պատճառաբանությամբ: Գագիկ Թադեւոսյանը սակայն, ըստ պաշտպանի, բողոք էր ներկայացրել ՀՀ գլխավոր դատախազություն, որը վերահասցեագրվել է Երեւան քաղաքի դատախազություն, որի պաշտոնակատարը որոշում է կայացրել քրեական գործ հարուցել:
Մեղադրանք դեռեւս ոչ ոքի չի առաջադրվել: Այժմ գործը նյութերի նախապատրաստման փուլում է, պաշտպանի խոսքով, պետք է կրկին նախաքննություն կատավի Կարինե Հարությունյանի մահվան իրական հանգամանքները բացահայտելու ուղղությամբ:
«Կոնկրետ այս պահին մեղադրանքի մասին դեռեւս վաղ է խոսել, որովհետեւ նախաքննություն պետք է ընթանա, նյութեր ձեռք բերվեն կոնկրետ անձի կամ անձանց մեղադրանք առաջադրելու մասին: Նախաքննության արդյունքում պետք է բացահայտվի՝ արդյոք մահվան հետ կապված կա՞ պատճառահետեւանքային կապ բժշկական հաստատության աշխատակիցների գործողություններում»,-նշեց Տաթեւիկ Սիրադեղյանը:
Նշենք, որ Կարինե Հարությունյանի հարազատները պնդում են, որ «Արարատ» Բժշկական կենտրոնի աշխատակիցները պատշաճ բուժոգնություն չեն ցուցաբերել կնոջը:
Ավելի վաղ NEWS.am-ը հայտնել էր, որ Արարատի մարզի Սուրենավան գյուղում օգոստոսի 17-ին տնամերձ հողամասում աշխատելիս Սուրենավանի բնակչուհի, 54-ամյա Կարինե Թադեւոսյանին օձ է խայթել։ Նրան տեղափոխել են Արարատի հիվանդանոց, այնուհետեւ Երեւան, որտեղ էլ կինը 2 օր անց մահացել է:
NEWS.am-ի հետ զրույցում Արարատի ԲԿ-ի տնօրեն Արայիկ Սարդարյանն ասել էր, որ կնոջն անհրաժեշտ բոլոր ներարկումներն արել են, սակայն կնոջ վիճակը կտրուկ վատացել է եւ իրենք նրան տեղափոխել են Երեւան: