Ոստիկանությունը մանրամասներ է հրապարակել Մասիսում նոյեմբերի 16-ին ուշ երեկոյան տեղի ունեցած վիճաբանության մասին, երբ համադասարանցիների վիրտուալ վեճը շարունակել էին ծնողները՝ երեխաներից մեկի շենքի բակում:
Ըստ ոստիկանության լրատվական ծառայության՝ նոյեմբերի 16-ին ժամը 23:35-ի սահմաններում անհայտ անձը ոստիկանության Մասիսի բաժնի ահազանգ է տվել, որ շենքերից մեկի բակում վիճաբանություն է տեղի ունեցել: Հաջորդ օրը ոստիկանություն է դիմել մի կին եւ հայտնել, որ իր տղայի համադասարանցին, նրա ծնողներն ու մի քանի անծանոթներ եկել են իրենց շենքի բակ, վիճել իրենց հետ, հարվածներ հասցրել՝ պատճառելով մարմնական վնասվածքներ:
Ոստիկանները պարզել են, որ դեպքի օրը համադասարանցիները շփվել են միմյանց հետո, ապա վիճել եւ հայհոյել միմյանց, որից հետո էլ եղել է այս ծեծկռտուքը:
«Աղջկա հետ նկար էր գցել սայթ, դասարանի տղաներով ասացինք՝ ջնջի, չջնջեց: Ես էլ հետո իրեն սայթով գրեցի, որ ջնջի, բայց չջնջեց, երկրորդ անգամ արդեն քֆուրով գրեցի»,- պատմել է համադասարանցիներից մեկը:
Նրա նամակը կարդացել է մյուս տղայի մայրը, որն էլ առաջարկել է հանդիպել եւ հարցը քննարկել:
Հենց քննարկման ժամանակ էլ սկսվել է վերոնշյալ վիճաբանությունը:
Կատարվում է քննություն:
Մանրամասները՝ ոստիկանության պատրաստած տեսանյութում: