Ռուսական Սու-24 օդանավի հետ կապված միջադեպից հետո Ռուսաստանի հետ հարաբերություններում առաջացած ճգնաժամի ֆոնին Անկարան առաջնահերթ է համարում Մոսկվայի հետ կապի բոլոր ուղիները բաց պահելը: ՌԻԱ Նովոստիի փոխանցմամբ, այս մասին Անկարայում կայացած մամուլի ասուլիսում հայտարարել է Թուրքիայի վարչապետ Ահմեդ Դավութօղլուն:
Ըստ նրա, Ռուսաստանի համար Թուրքիայի հետ տնտեսական հարաբերությունները նույնքան կարեւոր են, որքան Թուրքիայի համար՝ Ռուսաստանի հետ:
«Թուրքական կողմի վրա պատասխանատվություն դնելու ջանքերն անիրավաչափ են ինչպես միջազգային իրավունքի, այնպես էլ Ռուսաստանի եւ Թուրքիայի միջեւ բարիդրացիական հաարաբերությունների տեսանկյունից: Եթե պատասխանատու փնտրենք, ապա պետք է սկսենք այն երկրից, որը նախկինում բազմիցս խախտել է մեր օդային տարածքը: Ռուսական կողմի վերջին հայտարարություններն այն հայտարարությունները չեն, որոնք կարելի է ընդունել բարիդրացիության տեսանկյունից»,- ասել է Դավութօղլուն:
Հիշեցնենք, որ Ռուսաստանի նախագահ Վլադիմիր Պուտինը հանձնարարել է արգելել երկու երկրների միջեւ չարթերային չվերթները, գործատուներին արգելել է 2016 թվականի հունվարի 1-ից աշխատանքի ընդունել Թուրքիայի քաղաքացիների, որոշել է արգելել կամ սահմանափակել Ռուսաստանի տարածքում Թուրքիայի իրավասության ներքո գտնվող կազմակերպությունների գործունեությունը եւ արգելել կամ սահմանափակել թուրքական որոշ ապրանքների ներմուծումը: