Պրիմորիեի սաֆարի պարկի աշխատակիցներն առանձնացրել են ընկերացած Ամուր անունով վագրին եւ Տիմուր անունով այծին, ինչի հետեւանքով գիշատիչն ամբողջ գիշեր լաց է եղել: Այս մասին նշված է այգու կայքում:
Նշվում է, որ նախկինում Ամուրը հաճախ էր ոռնում, սակայն Տիմուրի հետ ընկերանալուց հետո դադարել է, ավելի հանգիստ ու հավասարակշռված դարձել:
Ըստ ՌԻԱ Նովոստիի, Ամուրը շաբաթական 2 անգամ կենդանի որս է ստանում՝ ճագարներ: Որոշվել է այսուհետ նրան այծ չտալ:
Այծին որպես որս բերել են Ամուրի ազատավանդակ, սակայն գիշատիչը չի կերել կենդանուն, քանի որ Տիմուրը քաջաբար դիմադրել է: Արդյունքում այծը նույնիսկ զբաղեցրել է վագրի քնելու տեղը՝ վերջինին ստիպելով քնել վանդակի տանիքին: Իսկ հիմա կենդանիներն անբաժան ընկերներ են դարձել: