«Նոր ժամանակներ» կուսակցությունը կոչ է անում բյկոտել սահմանադրական փոփոխությունների հանրաքվեն:

Այս առնչությամբ ՆԺԿ տարածած հայտարարությունում ասվում .

«Վերլուծելով 2015թ. դեկտեմբերի 6-ին նշանակված սահմանադրական փոփոխությունների հանրաքվեի  շուրջ Հայաստանում ընթացող ներքաղաքական գործընթացները, «Նոր Ժամանակներ» կուսակցությունը համոզմունք է հայտնում, որ մեր երկրի առջեւ ծառացած ներքին եւ արտաքին մարտահրավերների խորապատկերում հանրաքվեի անցկացումը ապաշնորհ վարչախմբի կողմից հասարակությանը պարտադրված սցենար է, որի իրական նպատակը իշխանության իրական լծակները Սերժ Սարգսյանի ձեռքում պահելն է: Այդ փոփոխությունները ոչ միայն չեն լուծում հասարակության առջեւ ծառացած անհետաձգելի սոցիալ-տնտեսական եւ արժեհամակարգային հիմնախնդիրները, այլեւ վտանգում են պետության արդյունավետ զարգացման գործընթացները:

Ելնելով վերոգրյալից եւ գիտակցելով երկրի մայր օրենքի կարեւորությունը հասարակության համար, «Նոր Ժամանակներ» կուսակցությունը միաժամանակ կարեւորում է ժողովրդի պատշաճ իրազեկումը առաջադրված փոփոխությունների բազմաթիվ անթույլատրելի նորմերին: Այդ համատեքստում առանձնացնելով քվեարկության դրվող սահմանադրության նախագծում տեղ գտած մի շարք նորմեր, որոնք անթույլատրելի են դարձնում այդ փաստաթղթի ընդունումը.

1. Նախագծով հնարավորություն է տրվում ապագայում սահմանադրության մեջ փոփոխություններ իրականացնել անմիջապես՝ Ազգային Ժողովի միջոցով;

2. Նախագծում համաչափ լուծում չի տրվում կառավարման համակարգի օպտիմալացման գերխնդրին, ինչն էլ ավելի կխորացնի երկրում տիրող ամենաթողության եւ անպատժելիության մթնոլորտը;

3. Նախագծով չի հաջողվել լուծում տալ Ազգային անվտանգության եւ բանակի արդյունավետ կառավարման  հիմնախնդիրներին;

4. Նախագիծը չի ապահովում աշխարհում ընդունված պառլամենտական կառավարման համակարգին բնորոշ կայուն մեծամասնության ստեղծման սկզբունքների ներդրումը եւ վտանգի տակ է դնում Հայաստանի բազմակուսակցական համակարգը;

«Նոր Ժամանակներ» կուսակցությունը   Հ ա յ տ ա ր ա ր ու մ  է. 

ա) Երկրում տիրող անօրինականության մթնոլորտում սահմանադրական փոփոխությունների անցկացումը ժամանակավրեպ է;

բ)  Միանշանակ պետք է   բ ո յ կ ո տ ե լ   դեկտեմբերի 6-ի սահմանադրական հանրաքվեն եւ չգնալ ընտրատեղամաս:

Բոյկոտի պարագայում վարչախումբը կանգնում է ծանրագույն խնդրի առաջ. Դրական արդյունք արձանագրելու համար նա նախ պետք է ապահովի ընդհանուր մասնակիցների թիվը, որից հետո «ԱՅՈ»-ների թիվը: