Հայաստանում երբեք ուժեղ ընդդիմություն չի եղել, ընդդիմությունն ուժեղ է, եթե օրենքով սահմանված լիազորություններ ունի, որը գործող Սահմանադրությամբ չկա: Այս մասին այսօր` նոյեմբերի 30-ին, լրագրողների հետ զրույցում ասաց ԱԺ «Բարգավաճ Հայաստան» կուսակցության պատգամավոր Վահան Բաբայան` նշելով, որ եթե ընդդիմությունը Սահմանադրությամբ սահմանված լիազորություններ չի ունենում, ստիպված է լինում փողոց գնալ եւ փորձում փողոցում փոխել ինչ-որ բան:
«Սահմանադրական փոփոխություններին «այո» պետք է ասենք իշխանության գերկենտրոնացվածությունից ազատվելու համար, անկախ դատական համակարգ ձեւավորելու համար եւ ընդդիմության հանդեպ ունեցած նոր ձեւակերպումների համար, 25 տարիների ընթացքում լուրջ դերակատարում չի ունեցել ընդդիմությունը, իսկ փոփոխություններով պետական կառավարմանը կարող է լուրջ մասնակցություն ունենալ: Պետք է համախմբված «այո» ասենք եւ նոր փոփոխություններ տեսնել երկրում»,-ասաց Վահան Բաբայանը:
Պատգամավորի խոսքով, «Ոչ»-ի ճակատը խոսում է ամեն ինչից, սակայն որեւէ հակափաստարկ չի կարողանում բերել սահմանադրական փոփոխություններին «ոչ» ասելու համար:
«Ասում են նույն բանը, որը միշտ ասել են, ընդդիմությունը հանրաքվեն շփոթում է նախագահական ընտրությունների հետ, դուք ձեզ հավատում եք, երբ ասում եք, որ իշխանափոխություն եք անելու: Իշխանափոխություններ անելու համար պետք են հնարավորություններ, հիմա որ Սահմանադրաությունը չփոխվեց, կարողանալո՞ւ եք իշխանափոխություն անել: Մատի փաթաթան եք դարձրել իշխանության վերարտադրությունը եւ ասում եք իշխանափոխություններ եք անելու: Մեր հարգարաժան ընդդիմությունը մոռացել է, թե որտեղից է եկել եւ ուր է գնում: Ինչ հիշում եմ 2008թ. խոսում եք, բայց ոչինչ չեք անում»,-ասաց Վահան Բաբայանը:
«Չեք անցկացնի» նախաձեռնության անդամ, ՀԱԿ կուսակցության անդամ Արշակ Մուսախանյանն էլ նշեց, որ Հայաստանում ընդդիմությունը միշտ էլ ուժեղ է եղել, ուղղակի ազատ-արդար մրցակցային ընտրություններ անցկացնելու հնարավորություններ չեն եղել:
«Ընդդիմությանը նոր սահմանադրությամբ իբր նոր լիազորություններ են տրվելու, դա ընդդիմությանը պետք չէ, քանի որ երկրում հակակշիռները վերանալու են եւ միակուսակցականություն է ստեղծվելու, իսկ մոնոպոլիայի ընթացքում խոսել ընդդիմության մասին անհնար է: Կոչ եմ անում սահմանադրական փոփոխություններին «ոչ» ասել, որովհետեւ սա իշխանությունների վերարտադրման հնարավորություն է: Նախագահը երկրորդ ժամկետից հետո առաջադրվելու հնարավորություն չունի, եւ քանի որ պետք է գնա թոշակի, առաջ է քաշել սահմանադրական փոփոխությունները»,-ասաց նա:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին:
