Սահմանադրական փոփոխությունների հանրաքվեի քարոզարշավի ընթացքում «Ոչ»-ը որեւէ հակափաստարկ չներկայացրեց. բովանդակային քննարկմանը չմասնակցած «Ոչ»-ի միակ փաստարկն այն էր, որ իշխանությունն է ներկայացնում եւ պետք է դեմ քվեարկել: Այսօր` նոյեմբերի 30-ին, լրագրողների հետ հանդիպմանը նման կարծիք հայտնեց ԱԺ ՀՀԿ խմբակցության պատգամավոր Լեւոն Մարտիրոսյանը:
«Ներկայացվում է առաջադիմական փոփոխությունների փաթեթ: Մենք տարիներ շարունակ խոսել ենք խորհրդարանական համակարգի անցնելու մասին, նույնիսկ այսօր դեմ արտահայտվող քաղաքական ուժերը ժամանակին ասում էին, որ անհրաժեշտ է կառավարման խորհրդարանական համակարգին»,- ասաց Լեւոն Մարտիրոսյանը:
Քաղաքագետ Ստյոպա Սաֆարյանի պնդմամբ` շատ քաղաքական ուժեր, որոնք կողմ են կառավարման խորհրդարանական համակարգին, ստիպված են «Ոչ» ասել Սահմանադրական փոփոխություններին:
«Այո, կողմ ենք խորհրդարանական համակարգին, սակայն դեմ ենք կայուն մեծամասնությանը, կախյալ դատական համակարգին, մարդու իրավունքների կրճատմանը: Ես ինքս դեմ եմ արտահայտվելու, որովհետեւ ինձ համար այս պարագայում նշանակություն չունի, թե որոշումը կկայացվի Բաղրամյան 26-ում, Բաղրամյան 13-ում, թե Մելիք-Ադամյան փողոցում»,- նշեց Ստյոպա Սաֆարյանը:
Քաղաքագետի խոսքով` եթե իշխանությունները լավ բան են նախաձեռնել, հասարակությունը գոնե կողմ կլիներ այս փոփոխություններին:
«Մենք ունենք ցածր վստահության հասարակություն: Միակ խնդիրը սա է, միշտ էլ կասկածամտություն կա: Սակայն սա չի նշանակում, որ չպետք է առաջ գնալ: Այսօրվա եւ առաջարկվող Սահմանադրությունների միջեւ սարերի ու ձորի տարբերություն կա»,- արձագանքեց ՀՀԿ-ական պատգամավորը` օրինակ բերելով Իսրայելին, Իտալիային:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին:
