Առաջիկա օրերն արտառոց օրեր են լինելու հայ ժողովրդի համար: Այս մասին այսօր՝ նոյեմբերի 30-ին, լրագրողների հետ հանդիպմանը հայտարարեց «Նոր Հայաստան»
հանրային փրկության ճակատի «Ընդդիմության միասնական շտաբի» ղեկավար Ժիրայր Սեֆիլյանը:
«Շեշտը դրել ենք, ոչ թե ոչ ասելու վրա, այլ հանրաքվեն կասեցնելու, ուրեմն սա նշանակում է, որ մոբիլիզացիայի անհրաժեշտություն կա, եւ այդ օրը հայտարարվել է դեկտեմբերի 1-ը: Այդ օրը պետք է հավաքվենք ազգովի: Մենք եղել ենք բոլոր շրջաններում, մեր խմբերը իրազեկել են բոլոր տարածքներում՝ օգտագործելով բոլոր հնարավոր միջոցները՝ հեռուստատեսություն, մամուլ, սոցցանցեր»,-ասաց Ժիրայր Սեֆիլյանը:
Նա վստահեցրեց, որ ժողովրդական պայքարը չի հասնելու մինչեւ դեկտեմբերի 6-ը, եւ կոչ արեց ժողովրդին ակտիվ մասնակցել դեկտեմբերի 1-ի հանրահավաքին:
Սեֆիլյանը շեշտեց՝ տուն չեն գնա, մինչեւ չազատվեն այս իշխանություններից:
«Ընդդիմության միասնական շտաբի» ղեկավարը նշեց, որ իրենք հոգացել են մարզերից՝ բնակիչների Երեւան տեղափոխվելու հարցը:
«Եթե իշխանությունը փորձի խոչընդոտել քաղաքացիների Երեւան տեղափոխվելուն, մենք այդ հարցը կփորձենք շրջանցել մեր միջոցներով: Մեր ժողովուրդը համապատասխան ցուցումն ստանալով կհասնի Երեւան»,- հայտարարեց Սեֆիլյանը:
Նշենք, որ «Նոր Հայաստան» հանրային փրկության ճակատը դեկտեմբերի 1-ին Երեւանի Ազատության հրապարակում համապետական շուրջօրյա հանրահավաք է անելու: Հանրահավաքով սկիզբ է դրվելու իշխանափոխություն իրականացնելու եւ ժամանակավոր կառավարություն ստեղծելու գործընթացին: