Հայաստանի Հանրապետության քաղաքացուն հետաքրքրում է, թե Սահմանադրական փոփոխություններով իր խնդիրները լուծվելու են, թե չէ: Այսօր` նոյեմբերի 30-ին, լրագրողների հետ հանդիպմանը նման կարծիք հայտնեց Միջազգային եւ անվտանգության հարցերի հայկական ինստիտուտի նախագահ Ստյոպա Սաֆարյանը` նշելով, որ սրան հակառակ քաղաքական ուժերին առավել հետաքրքրում է իրենց շահերը:
«Իշխանությունները դեռ մեկ տարի առաջ հայտարարեցին, որ եթե ուզում ենք մարդու իրավունքների բարելավում, պետք է լինեն Սահմանադրական փոփոխություններ: Սակայն այսօր, երբ ունենք արդեն նախագիծը, հասկանում ենք, որ դատական համակարգի եւ մարդու իրավունքների գլուխները հետնահանջ են ապրում: Տպավորություն է, որ դատական համակարգը ձեւավորել են պասերով»,- ասաց Ստյոպա Սաֆարյանը` նշելով, որ այս երկու գլուխների վերաբերյալ իրենց մտահոգություններն են հայտնում նաեւ փաստաբանները:
ԱԺ ՀՀԿ խմբակցության պատգամավոր Լեւոն Մարտիրոսյանի խոսքով, սակայն, առաջարկվող Սահմանադրությունը բարելավում է դատական համակարգը:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին:
