Հայ-թուրքական սահմանը հոկտեմբերին հատած աֆղաններ Շոքաթ Ամինզային եւ Սեդիղոլլահ Ալիզադեին ապաստան տրամադրելու հարցը Հայաստանի ՏԿԱԻՆ միգրացիոն ծառայությունը քննում է: Այս մասին NEWS.am-ի թղթակցին ասաց Միգրացիոն ծառայության պետ Գագիկ Եգանյանը:
«Աֆղանները դիմել են մեզ ապաստան ստանալու հարցով: Մենք վարչական վարույթ ենք հարուցել եւ ընթացակարգին համաձայն՝ քննում ենք դիմումը»,- ասաց Գագիկ Եգանյանը:
Նշենք, որ աֆղանների գործը դատարանում է. նրանք մեղադրվում են սահմանը հատելու մեջ: Ըստ մեղադրական եզրակացության՝ Շոքաթ Ամինզային նախնական համաձայնության է եկել Սեդիղոլլահ Ալիզադենի հետ եւ հոկտեմբերի 6-ին հատել են հայ-թուրքական սահմանը, սակայն բռնվել են սահմանային ծառայություն իրականացնող աշխատակիցների կողմից:
Նրանց մեղադրանք է առաջադրվել Քրեական օրենսգրքի 329-րդ հոդվածի 2-րդ մասի հատկանիշներով: Խափանման միջոց է ընտրվել կալանավորումը:
