Մինչ Փարիզում համաշխարհային առաջնորդները քննարկում են կլիմայական փոփոխությունների խնդիրը, Պեկինում օդի աղտոտվածության մակարդակը երկուշաբթի սպառնալից ցուցանիշների է մոտեցել:
Ըստ Չինաստանում օդի որակին հետեւող Air Quality հավելվածի տվյալների, թոքերի մեջ ներթափանցելու ունակություն ունեցող փոքր մասնիկների խտության մակարդակը Պեկինում երկուշաբթի հասել է խորանարդ մետրում 480 միկրոգրամի, իսկ որոշ շրջաններում ՝ մինչեւ 500-ի: Առողջապահության համաշխարհային կազմակերպության սահմանած անվտանգ մակարդակը խորանարդ մետրում 25 միկրոգրամ է, հայտնում է «ՌՒԱ Նովոստին»:
Երկուշաբթի սմոգն այնքան ուժեղ էր, որ Պեկինում չէին երեւում երկնաքերները, իսկ ճանապարհներին տեսանելիությունը ցերեկային ժամերին շատ ցածր էր:
Կիրակի Չինաստանի շրջակա միջավայրի պաշտպանության նախարարությունը հայտնել է, որ Հեբեյ, Շանդուն ու Շանսի հյուսիսային նահանգների 10 քաղաքներում արձանագրվել է աղտոտվածության ուժեղ մակարդակ: Եվս 21 քաղաքներում, այդ թվում Պեկինում ու Տյանցզինում աղտոտվածության մակարդակը գրեթե հասնում է «ուժեղի»:
Իշխանությունները մայրաքաղաքի բնակիչներին խորհուրդ են տվել փողոց դուրս չգալ:
«Սինհուա» գործակալության տվյալներով տեղական իշխանությունները կարող են լրացուցիչ միջոցառումներ ձեռնարկել խնդրի լուծման համար: Հնարավոր միջոցառումներից են գործարանները փակելը ու ճանապարհներին ավտոմոբիլային տրանսպորտի երթեւեկությունը կրճատելը: