Հայոց ցեղասպանության քրեականացման մասին օրինագիծը ցույց կտա, թե Ռուսաստանի Պետդումայում ում կարելի է Հայաստանի իսկական բարեկամ համարել: Այս մասին նոյեմբերի 30-ին լրագրողներին հայտնել է Հայոց ցեղասպանության թանգարան ինստիտուտի փոխտնօրեն, արեւելագետ Սուրեն Մանուկյանը:
Նա նաեւ շեշտել է, որ օրինագծի ճակատագիրը կանխորոշված չէ: Փաստաթուղթը Պետդումայի լիագումար նիստի օրակարգ է մտցված, բայց քվեարկությունը կարող է այն պահին լինել, երբ ռուս- թուրքական հարաբերությունների լարվածությունն արդեն մեղմացած կլինի: Անհասկանալի է, թե ինչպես է այդ հարցի շուրջ քվեարկելու իշխող «Եդինայա Ռոսիյան»: Կուսակցությունը դեռ որոշակի դիրքորոշում չի արտահայտել այս հարցի շուրջ: Դրա համար էլ օրինագծի ճակատագիրը միանշանակ չէ: Իսկ ինչ վերաբերում է «Սպրավեդլիվայա Ռոսիյա» կուսակցությանը ու նրա առաջնորդ Սերգեյ Միրոնովին, որն էլ հենց առաջադրել է այս օրինագիծը, ապա այդ կուսակցությունը երկար ժամանակ եւ հետեւողականորեն հանդես է գալիս Հայոց ցեղասպանության հարցի պաշտպանությամբ:
«Նրանք առաջ էլ էին մի շարք միջոցառումներ իրականացրել ու ըստ երեւույթին վաղուց էին պատրաստել այս օրինագիծը: Նրանք պարզապես այն ներկայացրել են, երբ հարմար առիթ է ստեղծվել: Ինչեւէ, օրինագծի ճակատագիրը թույլ կտա մեզ հասկանալ, թե Պետդումայի որ խմբակցությունն է մեզ հետ, ու ով է հավատում Հայաստանի ու Ռուսաստանի դաշնակցային հարաբերություններին, իսկ ում համար է քաղաքական կոնյուկտուրան ավելի կարեւոր: Մենք կկարողանանք տեսնել, արդյոք այն միայն ԱՄՆ կոնգրեսում է, թե նաեւ Ռուսաստանի Պետդումայում»,- հավելել է փորձագետը:
Հիշեցնենք, որ Ռուսաստանը առաջիններից մեկն է ճանաչել Հայոց ցեղասպանությունը՝ դեռ 1995 թ:
