Սահմանադրական փոփոխություններն արվում են իշխանությունների վերարտադրության համար: Այս մասին այսօր՝ նոյեմբերի 30-ին, «Այո»-ի եւ «Ոչ»-ի ռեալիթի շոուի շրջանակում Գեղարքունիքի մարզի Ծովագյուղ համայնքի բնակիչների հետ հանդիպմանն ասել է «Հայազն» կուսակցության վարչության անդամ Արմեն Մկրտչյանը:
«Սահմանադրական փոփոխությունները չեն արվում, որ մարդիկ վաղվանից լավ ապրեն, սոցիալական, կրթական վիճակը Հանրապետությունում բարելավվի: Սահմանադրական փոփոխություններն արվում են, որ գործող իշխանությունները շարունակեն իշխել: Այս օրերի ընթացքում մարզերի բնակիչները բողոքում են, որ քաղաքական համակարգի նկատմամբ վստահություն չունեն: Սա նշանակում է, որ քաղաքական համակարգը հիվանդ է»,- ասել է Արմեն Մկրտչյանը:
«Ոչ» քարոզող Արմեն Մկրտչյանի պնդմամբ՝ հանրաքվեի դրված նախագիծը հակասում է հավասարության սկզբունքին, համամասնական ընտրակարգին, ժողովրդավարությանը, մարդու ամենապարզ իրավունքներին:
«Հիմա ի՞նչ, գնանք, կողմ քվեարկենք, որ մեր իրավունքները ոտնահարվե՞ն: Իհարկե, ոչ, պետք է գնալ եւ դեմ քվեարկել այս նախագծին»,- ասել է նա:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին: