Կոտայքի մարզի Չարենցավան քաղաքում այսօր՝ նոյեմբերի 30-ին, «Այո»-ի եւ «Ոչ»-ի ռեալիթի շոուի ընթացքում վեճ է տեղի ունեցել «Ոչ»-ը ներկայացնող ՀԱԿ խմբակցության պատգամավոր, նախկին վարչապետ Հրանտ Բագրատյանի եւ ԱԺ ՀՀԿ խմբակցության պատգամավոր Վարդան Այվազյանի միջեւ:
Բագրատյանն այնքան է բորբոքվել, որ քիչ է մնացել՝ դիմի բռունցքների օգնությանը: Վեճի առիթը չարենցավանցի մի երիտասարդի հարցն է եղել, թե ուր էին «ոչ» ասողները 1995թ. եւ 2005թ Սահմանադրական հանրաքվեների ժամանակ:
«1995թ. Սահմանադրությունը իր բոլոր թերություններով եղել է լավագույնը: Այդ ժամանակ Չարենցավանի շտաբի գլխավորներից մեկը եղել է հենց Վարդան Այվազյանը»,- չարենցավանցի երիտասարդի հարցին ի պատասխան ասել է ՀԱԿ խմբակցության պատգամավորը:
Վարդան Այվազյանն էլ նշել է, որ ինքն իսկապես շտաբում եղել է. «Ատկազ չեմ կանգնում»: Այս լսելով Հրանտ Բագրատյանը բորբորքվել է՝ նշելով, որ օրերս ՀՀԿ-ական պատգամավորը հերքել է, թե ինքը հանձնաժողովի անդամ չի եղել:
«Պարոն Բագրատյան, Ձեր սուտ արտահայտությունները եթեր են գնալու, եթե ինձ ապացուցեք, որ ինչ-որ մի եթերում ասել եմ, որ ես ատկազ եմ եկել, պատրաստ եմ պաշտոնս էլ, պատգամավորությունս էլ վայր դնել»,- բարկացած արձագանքել է Վարդան Այվազյանը, ինչից հետո հնչել են փոխադարձ վիրավորանքներ են եւ մեղադրական արտահայտություններ:
«Բագրատյան, արա ժողովրդի մոտ չասես՝ սուտ եմ ասում, սուտը դու ես ասում, չխանգարես էլ ինձ կյանքում»,- խոսքը եզրափակել է Վարդան Այվազյանը:
Նշենք, որ Չարենացավանում այսօր բավականին թեժ է մթնոլորտը: