Հայաստանի Կենտրոնական բանկում բացված ՀԿ-ների հաշվեհամարներին քաղաքացիների փոխանցումները վճարային քարտերի միջոցով ուղղակիորեն իրականացումը հնարավոր չէ: Այս մասին հայտարարություն է տարածել ՀՀ Կենտրոնական բանկը՝ անդրադառնալով ՀՀ քաղաքացիների կողմից արվող հարցումներին՝ կապված վճարային քարտերի միջոցով ՀՀ կենտրոնական բանկում «Հանրաքվեի մասին» ՀՀ օրենքի 21-րդ հոդվածի դրույթների հիման վրա բացված Հասարակական կազմակերպությունների (այսուհետ՝ ՀԿ) հատուկ հաշվեհամարին գումար փոխանցելու հնարավորությանը։
ԿԲ տարածած հաղորդագրությունում նաեւ ասվում է.
«Հաշվի առնելով վերոհիշյալը, Հայաստանի Հանրապետության կենտրոնական բանկը հայտնում է, որ ՀՀ ԿԲ-ում բացված ՀԿ-ների հաշվեհամարներին քաղաքացիների փոխանցումները վճարային քարտերի միջոցով ուղղակիորեն իրականացումը հնարավոր չէ։ Տվյալ հաշիվների համալրման առավել օպերատիվ եւ մատչելի եղանակ է հանդիսանում քաղաքացիների կողմից բանկային փոխանցման իրականացումը։
Միեւնույն ժամանակ նշենք, որ ՀԿ-ները, բացելով հաշիվ ՀՀ տարածքում գործող առեւտրային բանկում եւ տեղադրելով այդ բանկի կողմից տրամադրված համապատասխան ծրագրային մոդուլը իրենց պաշտոնական կայքում, կարող են ընդունել վճարումներ այդ հաշվին, այնուհետեւ այդ հաշվին կուտակված գումարները՝ նախապես որոշված ընթացակարգով, կփոխանցվեն ՀՀ կենտրոնական բանկում ՀԿ-ի համար բացված համապատասխան հատուկ հաշվին: Հարկ է նշել որ այս դեպքում` կախված ընթացակարգից, գործընթացը ավելի երկար կարող է տեւել քան ուղղակի բանկային փոխանցումը:
Բացի վերոգրյալից, ՀՀ սուբյեկտների ՀՀ բանկային հաշիվների համալրումը / վճարումը քաղաքացիների կողմից հնարավոր է իրականացնել ստորեւ թվարկված հիմնական եղանակներով.
• Ինտերնետի միջոցով
o բանկերի կողմից առաջարկվող ինտերնետ բանկինգ ծառայության միջոցով,
o ինտերնետի օգնությամբ էլեկտրոնային դրամապանակների օգտագործման միջոցով
• Բջջային հեռախոսի միջոցով
o բանկերի կողմից առաջարկվող մոբայլ բանկինգ ծառայության միջոցով,
o բջջային հավելվածի օգնությամբ էլեկտրոնային դրամապանակների օգտագործման միջոցով»: