Հայ-իրանական կրթական համագործակցության զարգացումը մեծ ներուժ ունի: Այս մասին, այսօր՝ նոյեմբերի 30-ին, ՀՀ-ում Իրանի արտակարգ եւ լիազոր դեսպան Սեյեդ Քազեմ Սաջադիի հետ հետ հանդիպման ժամանակ նշել է ՀՀ կրթության եւ գիտության նախարար Արմեն Աշոտյանը:
ԿԳՆ-ից NEWS.am-ին հայտնում են, որ ողջունելով նորանշանակ դեսպանին՝ նախարարը շնորհավորել է Հայաստանում դիվանագիտական առաքելություն սկսելու կապակցությամբ եւ մաղթել արդյունավետ աշխատանք՝ միաժամանակ հույս հայտնելով, որ նրա գործունեությունը կնպաստի հայ-իրանական կրթական հարաբերությունների զարգացմանը:
«Մենք բարձր ենք գնահատում կրթության եւ գիտության ոլորտում Իրանի հետ մեր հարաբերությունները, բայց նաեւ վստահ ենք, որ կա առաջընթացի մեծ հնարավորություն»,- իր խոսքում նշել է Ա. Աշոտյանը՝ հավելելով, երկու ժողովուրդների ավանդական բերեկամությունն առավել արտահայտիչ է հատկապես կրթության եւ մշակույթի ոլորտներում:
Դեսպանն իր հերթին նշել է, որ հայ-իրանական հարաբերություններն այժմ դինամիկ զարգացում են ապրում բոլոր ոլորտներում, սակայն կրթության ոլորտի համագործակցությունը միշտ գերակա է: Հանդիպման ընթացքում կողմերն անդրադարձել են երկկողմ կրթական ծրագրերի իրագործման նոր հնարավորություններին՝ ինչպես բարձրագույն եւ հետբուհական, այնպես էլ հանրակրթության ոլորտներում:
Դեսպանը նշել է, որ Իրանը հետաքրքրված է ուսանողների փոխանակման երկկողմ ծրագրերով, մասնավորապես առաջարկելով, այս համատեքստում դիտարկել Թեհրանի Ազատ համալսարանի եւ ՀՀ բուհերի հետ համագործակցելու հետաքրքրությունը: ՀՀ ԿԳ նախարարը նշելով, որ Հայաստանը շահագռված է ՀՀ-ում իրանցի ուսանողների թվի ավելացման հարցում, շեշտել է, որ Հայաստանի բարձրագույն կրթության ոլորտում վերջին տարիներին մեծ աշխատանք է կատարվել կրթության որակի բարելավման եւ Եվրոպական բարձրագույն կրթական տարածքում կրթական փաստաթղթերի փոխճանաչման ուղղությամբ: Ա. Աշոտյանի խոսքով՝ Հայաստանը պատրաստակամ է նաեւ ԵՄ ծրագրերում ինտեգրման փորձը փոխանցել Իրանին:
Նախարարը նաեւ նշել է, որ Հայաստանի բուհերում իրանական կողմի հետ համատեղ գիտական ամբիոնի հիմնադրման հեռանկարը իրատեսական է համարում: Ա. Աշոտյանը հատուկ ընդգծել է, որ հայկական կողմի համար կարեւոր է՝ Իրանում գործող հայկական կրթական կենտրոնների զարգացումը եւ այս հարցում Հայաստանն ակնկալում է Իրանի կառավարության աջակցությունը:
Հանդիպման ընթացքում անդրադարձ է եղել նաեւ Հայաստանի եւ Իրանի միջեւ կրթական փաստաթղթերի փոխճանաչման գործընթացին, ինչպես նաեւ Հայաստանի դպրոցներում պարսկերեն լեզվի եւ մշակույթի հոսքային ուսուցման հնրավորության հարցերին: Պայմանավորվածություն է ձեռքբերվել փոխադարձ այցելություններ կազմակերպելու, համատեղ ծրագրերին առնչվող աշխատանքներն առավել ակտիվացնելու վերաբերյալ:
