Քաղաքացիական ակտիվիստ Վաղինակ Շուշանյանը համոզված է, որ Սահմանադրական փոփոխություններից հետո Հանրապետությունում սոցիալ-տնտեսական վիճակը չի բարելավվելու:
Այսօր՝ նոյեմբերի 30-ին, «Այո»-ի եւ «Ոչ»-ի ռեալիթի շոուի շրջանակում Կոտայքի մարզի Արզական համայնքի բնակիչների հետ հանդիպմանը «Ոչ» քարոզող ակտիվիստն ընդգծել է, որ գործող Սահմանադրությունը չի խանգարում նորմալ կառավարմանը:
«Ոչ մի համակարգ չի խանգարում, որ նորմալ կառավարեն երկիրը: Ցանկացած կառավարման համակարգում պետք է գործել կանոններով: Այսօր ոչ մի կանոն խախտված չէ, խախտողները հենց իշխանություններն են: Նորմալ թող աշխատի կառավարությանը, Հանրապետության նախագահը, ո՞վ է խանգարում»,- ասել է Վաղինակ Շուշանյանը:
Ակտիվիստը բերել է օրինակ, երբ բժիշկը 100 վիրահատություն է կատարել եւ 90 հիվանդ է մահացել, որից հետո հայտարարել է, թե առողջապահության նախարար նշանակվելուց հետո ավելի լավ կլինի. «Նույնն էլ էսօր իշխանություններն է անում: Սահմանադրական փոփոխություններին կողմ քվեարկելով՝ ժողովրդի վիճակն ավելի է վատանալու»:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին: